Nga Katy Balls, SPECTATOR

Boris Johnson pësoi një tjetër goditje për lidershipin e tij këtë mëngjes, pasi konservatorët humbën në dy palë zgjedhje plotësuese brenda natës.

Laburistët morën ‘Wakefield’ nga konservatorët me 4925 vota- një ndryshim prej 12.7 përqind. Ndërkohë Liberal Demokratët arritën të përmbysin shumicën konservatore prej 24.239 votash në ‘Tiverton and Honiton’ duke mposhtur konservatorët me 6144 vota, me një ndryshim prej gati 30 përqind.

Liderët e opozitës nxituan për të shpallur sukseset e tyre. Keir Starmer i Laburistëve tha se rezultati ishte një gjykim i qartë për qeverinë konservatore, kurse udhëheqësi Liberal-Demokrat, Ed Davey tha se rezultati i tyre është i barabartë me fitoren më të madhe në zgjedhjet plotësuese që ka parë vendi ndonjëherë.

Por çfarë do të thotë e gjitha kjo për Boris Johnson dhe Partinë Konservatore? Përpara votimeve, ekzistonte në ‘Downing Street’ një ndjenjë se humbjet ishin të mundshme. Gjatë muajve të fundit, Johnson është përballur me shumë tituj negativë për skandalin me festat dhe e ka ndjerë nxehtësinë që po afrohej për shkak të krizës së çmimeve. Sikur Johnson të arrinte të mbante një prej këtyre zonave, do të ishte një sukses i madh duke pasur parasysh pritshmëritë shumë të ulëta. Mesazhi në qeveri ka qenë se nuk duhet pritur shumë nga këto zgjedhje dhe se ka ende kohë për të ndryshuar gjërat.

Niveli i pakënaqësisë së brendshme mes konservatorëve u evidentua në fillim të këtij muaji, kur deputetët e Johnson provokuan një votë mosbesimi ndaj tij. Johnson e fitoi atë dhe është teknikisht i sigurt nga sfida për të paktën 12 muaj (ndërsa është folur për ndryshimin e rregullave për të lejuar një sfidë para kësaj kohe, askush nuk pret që kjo të ndodhë kaq shpejt).

Që tani kanë nisur të ngrihen pyetje në lidhje me funksionimin e shtabit të fushatës konservatore. Oliver Dowden ka dhënë dorëheqjen si kryetar i partisë. Ka pasur zëra për një mini-organizim përpara zgjedhjeve plotësuese si një mënyrë për Johnson për të treguar se po merr përgjegjësinë për të çuar përpara axhendën e lajmeve. Megjithatë për momentin, kryeministri është jashtë vendit në Ruanda për një takim të liderëve të Komonuelthit. Kjo nuk do t’i ndalojë deputetët konservatorë të bëjnë një kërkim serioz për shpirtin kur bëhet fjalë për të kuptuar këto rezultate. Kjo do të ushqejë frikën se partia po shtrydhet nga Laburistët në disa pjesë të ‘murit të kuq’ dhe nga Liberal-Demokratët në jug. Deputetët konservatorë, në zonat ku Liberal-Demokratët janë partia e dytë më e madhe, do ndjehen veçanërisht nervozë.

Kur bëhet fjalë për të ardhmen e Boris Johnson si udhëheqës i konservatorëve, linja që mbështetësit e tij priren të përdorin kur përpiqen që të bindin deputetët konservatorë të qëndrojnë në anën e tij është se ai është një fitues i dëshmuar i zgjedhjeve. Por vota e të enjtes do të shtojë shqetësimet në parti se kjo nuk është më kështu.