Vendet evropiane po shohin një rritje të konsiderueshme të rasteve të Covid-19 të nxitura nga nënvariantet shumë infektive të Omicron, duke rritur frikën për një valë të re globale të sëmundjes ndërsa imuniteti bie dhe sezoni i udhëtimeve verore po fillon.

Qendra Evropiane për Parandalimin dhe Kontrollin e Sëmundjeve (ECDC) paralajmëroi javën e kaluar se "përparësia e rritjes e raportuar për BA.4 dhe BA.5 sugjeron që këto variante do të bëhen dominuese" në të gjithë Bashkimin Evropian dhe ndoshta do të rezultojnë në një rritje të rasteve.

Infeksionet po rriten në shumë vende, duke përfshirë Portugalinë, Gjermaninë, Francën, Greqinë, Austrinë, Italinë, Zvicrën dhe Spanjën.

Studimet e reja kanë treguar se nënvariantet Omicron BA.4 dhe BA.5 kanë një avantazh në rritje, krahasuar me variantet e mëparshme dhe duket se mund të shmangin shumë mirë mbrojtjen e sistemit imunitar.

As infeksionet e mëparshme dhe as vaksinat nuk ofrojnë mbrojtje veçanërisht efektive kundër nënvarianteve.

"BA.4 dhe BA.5 nuk duket se çojnë në simptoma më të rënda, por, si me valët e mëparshme, rritja e rasteve mund të rezultojë në një rritje të shtrimeve në spital dhe vdekjeve," ka thënë ECDC.

Portugalia ka pasur një rritje të konsiderueshme të infeksioneve. Të martën, vendi regjistroi një mesatare ditore prej 1,332 rastesh të reja për milion njerëz gjatë një jave, shkalla e pestë më e lartë e rasteve të reja në botë. Ndërkohë janë regjistruar 760 ratse në Gjermani dhe 747 në Francë.

Në Francë, numri i rasteve të reja është trefishuar që nga fillimi i muajit dhe shtrimet në spital po rriten për herë të parë që nga fillimi i prillit.