Ndërsa mijëra ukrainas vazhdojnë të ikin nga pjesët e pushtuara nga Rusia të Ukrainës jugore, ata përballen me ngacmime nga trupat ruse, ndonjëherë dhe sulme.
Më shumë se një duzinë njerëz kanë folur gjatë për CNN për udhëtimet e tyre të tmerrshme jashtë rajonit Kherson, i cili ka qenë nën kontrollin rus që nga fillimi i pushtimit në fund të shkurtit.
Ata tregojnë për zhdukjet e pashpjegueshme gjatë natës, klimën e frikës dhe mungesat akute që i shtynë ata të iknin.
Zyrtarët ukrainas thanë të premten se rusët tani kanë bllokuar daljet nga Kherson në zonat e kontrolluara nga qeveria ukrainase dhe po përpiqen të dërgojnë të gjithë ata që duan të largohen në Krime.
Ata thonë se rusët kanë intensifikuar patrullimet dhe kanë shtuar numrin e pikave të kontrollit.
Disa njerëz janë vrarë dhe shumë të tjerë janë plagosur kur autokolonat e tyre u bllokuan në atë që njihet si "zona gri" midis linjave ruse dhe ukrainase.
Të paktën dy autokolona u rrethuan për ditë të tëra rreth Davydiv Brid, një fshat i vendosur në toka bujqësore ku takohen rajonet e Kherson dhe Zaporizhzhia.
Një kolonë u qëllua një javë më parë: Një burrë u vra dhe disa persona u plagosën.
Këtë javë, të paktën tre persona u vranë dhe shumë të tjerë u plagosën në fshat kur një kolonë prej rreth 100 automjetesh civile u qëllua, sipas dëshmitarëve.
© SYRI.net