"Ata janë të këqinj si një banane e kalbur. Ata e vranë babin tim." - Këto janë fjalët e një djali pesëvjeçar, babai i të cilit vdiq në sulmet terroriste të Parisit të vitit 2015.

Nisur nga mosha e tij, Etienne nuk ishte i pranishëm në gjykatën speciale në Paris, ku katërmbëdhjetë persona janë në gjyq për sulmet më vdekjeprurëse në Francë që nga Lufta e Dytë Botërore.

Por fjalët prekëse të djalit u lexuan në gjykatë nga avokati i familjes së tij Manon Cournac të enjten.

Babai i Etienne, Antoine, ishte një nga 90 personat që u vranë në sallën e koncerteve Bataclan gjatë sulmeve terroriste më 13 nëntor 2015.

Antoine dhe Aurore, nëna e djalit, ishin të dy të pranishëm në një koncert të “Eagles of Death Metal” kur Franca u sulmua nga terroristët e të ashtuquajturit grupi Shteti Islamik (ISIS). Aurore, e cila ishte dy muajshe shtatzënë, mbijetoi pasi u mbajt peng nga sulmuesit.

Etienne lindi shtatë muaj më vonë në maj 2016 dhe është rritur duke mos e njohur kurrë babanë e tij.

“Për vëmendjen e të pandehurve: ata janë të këqinj aq sa një banane e kalbur”, ka shkruar ai, sipas Cournac.

"Ata vranë babin tim dhe kjo vërtet nuk është e mirë. Atyre nuk duhet t’u jepet ushqim, në mënyrë që të vdesin. Unë dua që të vdesin sepse janë vërtet të tmerrshëm. Jam i zemëruar sepse ata janë të këqij."

Dëshmitë e të mbijetuarve dhe të afërmve të 130 viktimave të sulmeve kanë qenë një përkujtim mizor i asaj se sa familje u shkatërruan në nëntor të vitit 2015.

"Humbja e Antoine është aq e fuqishme sa më fundos," tha Aurore në gjykatë.

"Urrejtja juaj nuk do ta njollosë kurrë dashurinë tonë dhe pastërtinë e zemrës. Ju nuk jeni asgjë, kurse ne jemi gjithçka tjetër. Ne do të vazhdojmë të luftojmë ditë pas dite."

Anëtarët e grupit “Eagles of Death Metal” dhanë gjithashtu dëshmi prekëse për sulmin në sallën e koncerteve Bataclan në Paris.

Salah Abdeslam është i vetmi anëtar i mbijetuar i celulës terroriste të IS që kreu sulmet në Paris. Të gjithë të dyshuarit e tjerë u vranë gjatë sulmeve nga policia franceze ose jelekët vetëvrasës që shpërthyen.

Gjyqi i paprecedentë në Francë pritet të përfundojë në qershor.