“Ndaloni torturat në kufij”, “Askush nuk është i paligjshëm” janë këto sloganet që mbanin në duar mijëra protestues në Poloni të cilët marshuan në shenjë solidariteti me emigrantët dhe azilkërkuesit të cilët përpiqen të kalojnë kufirin mes Bjellorusisë dhe Polonisë.

Ata akuzojnë autoritetet polake për sjellje brutale ndaj emigrantëve duke i kthyer në kufij.

Vendosja e situatës së emergjencës në kufij ka ndaluar punonjësit e të drejtave të njeriut të shkojnë e të ndihmojnë njerëzit në nevojë.

“Nuk jam dakord me metodat e përdorura nga autoritetet, kthime ilegale, kundërshtime e mbi të gjitha në kufij vdesin gra e fëmijë. Është thjesht e turpshme”, tha Agnieszka Holland, regjisor.

“Edhe unë kam qenë refugjat. Erdha në Poloni në 1996. Kalova kufirin pikërisht ku njerëzit po vdesin tani. Kam qëndruar aty 20 ditë, ndaj e di çfarë po them. Më vjen vërtet shumë keq për ata njerëz që janë vetëm, pa asnjë ndihmë”, Elmi Abdi, president i Shoqatës Somali në Poloni.

Ndërkohë, vendasit që jetojnë pranë kufirit po nxiten të ndezin një dritë jeshile për të sinjalizuar se ata mund t’u sigurojnë emigrantëve ushqim dhe strehim.

Emigrantët në kufi janë duke u përballur me temperatura shumë të ulëta, e madje në mediat sociale ka nisur një  fushatë për të rritur ndërgjegjësimin për ndihmë.