Djali i diktatorit të ndjerë të Filipineve, Ferdinand Marcos, i cili mban të njëjtin emër me babain e tij, njoftoi të martën se do të kandidojë për president në zgjedhjet e vitit të ardhshëm.
Ferdinand Marcos Jr, i cili në popull njihet si "Bongbong", ishte shpallur si një kandidat potencial ose për presidencën ose nën-presidencën.
"Bashkohuni me mua në këtë kauzë më fisnike dhe ne do të kemi sukses. Së bashku, ne do të ngrihemi përsëri," tha 64-vjeçari në një fjalim të transmetuar në mediat sociale.
Marcos ka shërbyer si guvernator krahinor, kongresmen dhe senator dhe kandidoi pa sukses për zëvendëspresidencën në 2016, një humbje që ai e sfidoi në gjykata. Motra e tij Imee është një senatore dhe nëna Imelda një ish -kongresiste.
Ai është kandidati i katërt që shpall kandidimin për presidencën. Senatori Panfilo Lacson, një ish -shef policie, gjithashtu synon të kandidojë në garë për të zëvendësuar Presidentin Rodrigo Duterte, i cili nuk lejohet të kandidojë për një mandat të dytë sipas kushtetutës, dhe ka vendosur të dalë në pension. Edhe legjenda e boksit Manny Pacquiao nga Filipine, ka njoftuar se do të tërhiqet nga ky sport për t’u përqëndruar në karrierën e tij politike. Kampioni botëror i shumë divizioneve, i cili është senator në Filipine ka shpallur tashmë synimin e tij për të kandiduar për president në zgjedhjet e vendit 2022.
Marcos të martën bëri një betim si kryetar i një partie politike që më herët e kishte emëruar atë si kandidatin e saj presidencial.
Kandidimi i tij për postin kryesor do të ishte një hap i madh në një vend ku shumë janë ende duke u shëruar nga epoka e sundimit ushtarak të viteve 1970 të plakut Marcos.
Familja e tij, një nga më të famshmet në Filipine, ka kërkuar prej kohësh të restaurojë imazhin e saj dhe në mënyrë të përsëritur ka mohuar akuzat se ka plaçkitur miliarda dollarë pasuri shtetërore kur ishte në pushtet.
© SYRI.net