Australia mbrojti të dielën vendimin për prishjen e marrëveshjes për nëndetëset me Francën, për të cilin deklaroi se Parisi zyrtar ishte njoftuar muaj më parë.

Reagimi erdhi pas arritjes së akordit të ri me Shtetet e Bashkuara dhe Britaninë e Madhe, që shkaktoi irritimin e qeverisë franceze.

Në vitin 2016, qeveria në Kanberra arriti një marrëveshje me Grupin Detar të Francës për ndërtimin e një flote nëndetësesh, që tashmë do të zëvendësohet me paktin për pajisjen me 8 nëndetëse me fuqi bërthamore, me teknologji amerikane dhe britanike, në kuadër të një marrëveshjeje trepalëshe.

Lëvizja acaroi Francën, duke detyruar presidentin Macron të thërrasë për konsultime ambasadorët në Shtetet e Bashkuara dhe Australisë.

Në reagimin e tij, kryeministri australian, Scott Morrison tha se e kuptonte zhgënjimin e Francës për anulimin e marrëveshjes 40 miliardë dollarëshe, por theksoi se Australia duhet t’i marrë gjithmonë vendimet në favor të interesave të saj.

“Unë e kuptoj zhgënjimin e tyre, por në të njëjtën kohë, Australia, si çdo vend tjetër sovran, duhet t’i marrë vendimet në përputhje me interesat e saj kombëtare dhe kjo është ajo çfarë kemi bërë në këtë rast”, u shpreh ai.

Sidoqoftë, kjo situatë e ka vendosur Uashingtonin në një krizë të paprecedentë diplomatike me Francën, që analistët thonë se mund të dëmtojë aleancën mes tyre, si dhe vë në dyshim përpjekjet për bashkim që administrata e presidentit Biden po kërkon për t’i bërë ballë fuqisë në rritje të Kinës.