Thierry Breton, Komisioneri evropian përgjegjës për furnizimin me vaksina të bllokut, ka thënë se BE mund të mos e rinovojë kontratën e saj me AstraZeneca për shkak të mungesave të vazhdueshme të dërgesave të kompanisë anglo-suedeze.

"Ne jemi pragmatikë," tha Breton për stacionin televiziv francez BFM-TV.

"Prioriteti im, si personi i ngarkuar me dorëzimin e vaksinave, është që ata me të cilët kemi kontrata të dorëzojnë sasitë e përcaktuara në kohën e caktuar"

Breton tha se AstraZeneca ishte zotuar të furnizonte me 120 milionë doza, BE-në në tremujorin e parë të 2021, por kishte dorëzuar vetëm 30 milionë dhe e kishte ulur angazhimin e saj për 180 milionë në tremujorin e dytë - në 70 milionë. Kontrata e saj me bllokun skadon në fund të qershorit.

"Asgjë nuk është përfundimtare dhe ne do të vazhdojmë të negociojmë", tha Breton, duke shtuar se çdo vendim përfundimtar nuk do të "lidhej me një arsye epidemiologjike ose mjekësore - të dhënat tregojnë se përfitimet e vaksinës AstraZeneca janë të mëdha krahasuar me sëmundjen".

Presidentja e komisionit, Ursula von der Leyen, njoftoi javën e kaluar se blloku do të merrte 50 milionë doza shtesë të vaksinës Pfizer/BioNTech në tremujorin e dytë dhe se ishte në bisedime për një kontratë të re për 1.8 miliardë doza në 2022 dhe 2023.

"Ne duhet të përqendrohemi në teknologjitë që kanë provuar vlerën e tyre", tha von der Leyen, duke shtuar se Pfizer / BioNTech "ka provuar të jetë një partner i besueshëm. Ajo i ka përmbushur zotimet e saj dhe u përgjigjet nevojave tona ”.