Ambasadori i Mianmarit në Londër e ka kaluar natën në makinën e tij pasi ai tha se i kanë mbyllur derën e ambasadës dhe e kanë lënë jashtë.

I dërguari Kyaw Zwar Minn tha që personelit iu kërkua të largohej nga ndërtesa nga atasheu ushtarak i Mianmarit të mërkurën në mbrëmje dhe atij iu tha se nuk ishte më përfaqësuesi i vendit.

Ushtria e Mianmarit e mori pushtetin në një grusht shteti në 1 shkurt, duke shkaktuar javë të tëra protestash dhe përshkallëzuar dhunën.

Ambasadori Kyaw Zwar Minn ka bërë thirrje që udhëheqësja e rrëzuar Aung San Suu Kyi të lirohet.

Më shumë se 500 njerëz - përfshirë dhjetëra fëmijë - janë vrarë deri tani ndërsa protestuesit pro-demokracisë kërkojnë një kthim në pushtet të udhëheqëses së zgjedhur znj. Suu Kyi dhe partisë së saj Lidhja Kombëtare për Demokraci (NLD).

Ambasadori Kyaw Zwar Minn i përshkroi ngjarjet e së mërkurës si "një lloj grushti shteti, në mes të Londrës", njoftoi Reuters. "Mua më është mbyllur dera ... Ky lloj grushti shteti nuk do të ndodhë," shtoi ai.

Ambasadori u fotografua duke qëndruar në rrugë jashtë ambasadës në Mayfair të Londrës duke folur me oficerët e forcës së Policisë Metropolitane.