Presidenti i Koresë së Jugut, Moon Jae-in, bëri vaksinën e koronavirusit të AstraZeneca të martën përpara një udhëtimi jashtë shtetit, pasi vendi filloi të imunizonte më shumë të moshuar dhe punonjës shëndetësorë në përpjekje për të përshpejtuar vaksinimin e tij, raporton Reuters.

Moon, 68 vjeç, u vaksinua në një klinikë të komunitetit pranë zyrës së tij në Seul për t'u përgatitur për një vizitë të planifikuar në Mbretërinë e Bashkuar për një samit të G7 në qershor.

Gruaja e Moon dhe nëntë ndihmësit e tij që do ta shoqërojnë në udhëtim, përfshirë Këshilltarin e Sigurisë Kombëtare Suh Hoon, gjithashtu u vaksinuan, tha zyra e tij në një deklaratë.

Kryeministri britanik Boris Johnson e ka ftuar Korenë e Jugut, Indinë dhe Australinë të marrin pjesë në samit si mysafirë.

Qeveria e Koresë së Jugut të martën filloi të imunizojë gati 300,000 njerëz në spitalet e kujdesit dhe shtëpitë e të moshuarve që janë mbi 65 vjeç dhe punonjësit mjekësorë në to ndërsa rrit forcën e vaksinimit.

Rreth 680,000 profesionistë të kujdesit shëndetësor me rrezik të lartë dhe njerëz të sëmurë rëndë janë vaksinuar që kur filloi fushata në fund të shkurtit, sipas Agjencisë së Kontrollit dhe Parandalimit të Sëmundjeve të Koresë.