Lëvizja populiste Pesë Yje votoi të enjten për të mbështetur një qeveri të re italiane të udhëhequr nga ish-shefi i Bankës Qendrore Evropiane Mario Draghi.

Në një votim në internet, 59.3% e dhjetëra mijëra anëtarëve të lëvizjes votuan për të mbështetur Draghi, të cilit iu dha një mandat nga presidenti i Italisë Sergio Mattarella për të formuar një qeveri të re javën e kaluar.

Lëvizja Pesë Yje mban më së shumti vende në parlament por nuk ishte e qartë nëse lëvizja anti-elitë do të mbështeste ish-shefin e BQE dhe bankën qendrore italiane.

"Në një nga momentet më dramatike të historisë sonë të kohëve të fundit, Lëvizja 5 Yje zgjedh rrugën e guximit dhe pjesëmarrjes, por mbi të gjitha zgjedh rrugën Evropiane," tha Luigi di Maio, Ministri i Punëve të Jashtme të Italisë.

Ai u kishte bërë thirrje anëtarëve të lëvizjes të votonin në favor të Draghi.

Kjo do të thotë që Draghi tani ka mbështetjen e pothuajse të gjitha partive në parlament dhe pritet të zbulojë qeverinë e tij së shpejti.

Prioritetet e qeverisë së re përfshijnë fushatën e vaksinimit dhe më shumë se 200 miliardë € fonde shërimi nga Bashkimi Evropian.

Italia, e zhytur në recesionin e saj më të keq që nga fundi i Luftës së Dytë Botërore, duhet të paraqesë planin e saj në Bruksel deri në fund të Prillit.

Kriza aktuale politike buroi nga tërheqja e Matteo Renzi nga koalicioni qeverisës politik për përdorimin e fondeve të rimëkëmbjes COVID.

Ky veprim bëri që Kryeministri Giuseppe Conte të hiqte dorë nga posti i tij megjithëse i mbijetoi dy votave të besimit në parlament.