Ushtria Amerikane njoftoi të martën një seri politikash të reja që do të lejojnë ushtaret të mbajnë flokët bisht, buzëkuq dhe madje edhe vathë.

Sipas politikës së re, gratë mund të mbajnë manikyrin në thonj për sa kohë që ngjyrat vlerësohen “të pranueshme”. Ushtarët gjithashtu mund të nxjerrin në pah flokët e tyre për sa kohë që zgjedhin një ngjyrë natyrale. Ngjyra të caktuara si vjollca, roza, blu, jeshile, portokalli, e kuqe e ndezur dhe ngjyra fluoreshente ose neoni nuk lejohen.

Politika aktuale do të heqë gjithashtu kufizimet mbi ushtarët që thurin, përdredhin, kapin ose bëjnë flokët gërshetë, por përcakton disa specifikime për ta bërë këtë. Udhëzimet e reja do të hyjnë në fuqi në fund të shkurtit.

Një rishikim i politikës u urdhërua fillimisht vitin e kaluar nga sekretari i atëhershëm i Mbrojtjes Mark Esper në një përpjekje për të adresuar pabarazinë në ushtri.

Politika e re gjithashtu heq gjuhën ofenduese si “Fu Manchu” dhe “Mohawk” nga formulimi. Në një prezantim të dhënë nga udhëheqja ushtarake amerikane, zyrtarët shpjeguan se “modeli mohawk e ka marrë emrin nga njerëzit e kombit Mohawk. Fu Manchu është konsideruar fyes për kulturën aziatike”.

Nxitja për gjithëpërfshirje dhe barazi kur bëhet fjalë për flokët ka qenë së fundmi në të gjithë SHBA, pasi shtatë shtete kanë miratuar legjislacionin për të ndaluar diskriminimin natyror të flokëve të njohur si “The Crown Act”.

Majori i Ushtrisë Michael A. Grinston hyri në detaje rreth procesit të rishikimit të politikës në një temë në Twitter.

“Besoj se bëmë një hap të mirë përpara me këto ndryshime. Jam krenar për përpjekjen e bërë për këtë, por biseda nuk ka mbaruar. Ne jemi një organizatë mësimore dhe nuk do të kalojnë edhe 5 vjet që standardi i rregullimit të adresohet përsëri”, shkroi Grinston në Twitter.

Një komitet prej 17 anëtarësh, i përbërë nga 15 gra dhe 2 burra që ishin kryesisht njerëz me ngjyrë, votuan për ndryshimet. Rekomandimet e reja u bazuan në vlerësime nga dermatologë, psikologë dhe një këshilltar i mundësive të barabarta i ngarkuar për të eksploruar sesi sëmundje si alopecia mund të shkaktohen me ritme më të larta në racat e caktuara dhe se si fjalët e caktuara mund të kenë një efekt psikologjik.

Sa për lejimin e mjekrës për burrat në Ushtri, Grinston u përgjigj prerë: “Jo”.