Një mutacion i koronavirusit është zbuluar rishtas në Garmisch-Partenkirchen. Ai është i ndryshëm nga ai që u gjet fillimisht në Mbretërinë e Bashkuar, por mjekët nuk e dinë ende nëse është shumë infektiv.

Një variant i ri i koronavirusit u zbulua të hënën në 35 pacientë në një spital në Gjermaninë jugore. Ende nuk dihet se sa ngjitës dhe as sa vdekjeprurës është varianti i ri, konfirmoi drejtori menaxhues i klinikës Garmisch-Partenkirchen. "Fakti i thjeshtë se është një variant i ri, nuk do të thotë se është më infektues," tha Frank Niederbühl.

Edhe zëvendësdrejtori mjekësor, Clemens Stockklausner, tha se nuk kishte ende nevojë për panik. "Duhet të presim për sekuencën e plotë. Ne nuk mund të themi në këtë moment nëse ky (mutacion) ka ndonjë rëndësi klinike," u tha ai gazetarëve. Mostrat janë dërguar në spitalin Charite të Berlinit për ekzaminim të mëtejshëm.

Mutacion i ri, i ndryshëm nga variantet në Afrikën e Jugut dhe  Mbretërinë e Bashkuar

Stockklausner theksoi se mutacioni i ri ishte i ndryshëm nga ato që u gjetën në Mbretërinë e Bashkuar dhe Afrikën e Jugut. Të dyja këto variante janë më infektive, megjithëse asnjëri nuk ka çuar në shifra më të larta të vdekshmërisë. Ndoshta edhe më në mënyrë të konsiderueshme, variantet e reja nuk e zvogëlojnë ndikimin e vaksinave që po ofrohen aktualisht, sipas ekspertëve mjekësorë.