Autoritetet greke kanë vendosur t’i detyrojnë me forcë, dy klinika shëndetësore private dhe stafin e tyre në veri të Greqisë për të pranuar pacientë me COVID, pasi spitalet publike të rajonit janë të tejmbushura nga një rritje e rasteve të infektimit gjatë javëve të fundit, tha Ministria greke e Shëndetësisë të premten.

Ministria tha se kishte kërkuar që shtretërit në spitalet private të viheshin në dispozicion të sistemit shëndetësor publik për trajtimin e pacientëve Covid-19, por  "me gjithë përpjekjen, gjetja e një zgjidhjeje të pranueshme nga të dy palët nuk qe e mundur".

Ndaj, Ministria tha se që nga e premtja po i përvetësonte me forcë të dy klinikat dhe stafin e tyre në qytetin verior të Selanikut, qendra e dytë më e madhe urbane e Greqisë që po kryeson numrin e infektimeve.

"Në prefekturën e Selanikut dhe pas barrës shumë të rëndë epidemiologjike që po provon kufijtë e spitaleve si dhe të personelit, u konsiderua e nevojshme të vendoseshin shtretër të thjeshtë Covid-19 në klinika private," tha ministria.

Greqia kryesisht i shpëtoi shpërthimit fillestar të koronavirusit në pranverë, me qeverinë që vendosi një bllokim të hershëm, por ka parë një ringjallje të madhe të virusit pas verës, duke çuar në dhjetëra vdekje çdo ditë dhe mijëra infeksione të reja. Gati 500 njerëz janë të intubuar në njësitë e kujdesit intensiv në të gjithë vendin.

Sipas shifrave të fundit të lëshuara të enjten në mbrëmje, kishte më shumë se 85,200 raste të konfirmuara të koronavirusit dhe një total prej gati 1,350 vdekjesh në këtë vend me rreth 11 milionë njerëz.

Ata që dëshirojnë të largohen nga shtëpia mund ta bëjnë këtë vetëm për arsye specifike dhe duhet të njoftojnë autoritetet me anë të një mesazhi telefonik ose të mbajnë një leje të shkruar vetë. Sidoqoftë, nuk ka asnjë kufizim për sa kohë njerëzit mund të lënë shtëpitë e tyre ose sa herë në ditë.

Përhapja ka qenë veçanërisht e rëndë në veri të Greqisë, ku spitalet janë nën presion në rritje. Autoritetet kanë rritur numrin e shtretërve të kujdesit intensiv në vend, duke dyfishuar numrin në dispozicion që nga mesi i vitit 2019 kur qeveria aktuale erdhi në pushtet.

Nga 1,203 shtretër të Kujdesit Intensiv tani të disponueshëm në të gjithë vendin, 579 janë vënë në dispozicion ekskluzivisht për pacientët Covid-19, sipas shifrave të lëshuara të mërkurën.  Prej tyre, 440 janë zënë.

Selaniku kishte 211 shtretër të Kujdesit Intensiv të disponueshëm për Covid-19, nga të cilët 199 janë mbushur tashmë.