Tajlanda ka nisur testimin e një vaksine për koronavirus në majmunë pas rezultateve pozitive në minj, ka njoftuar Ministri tajlandez për Edukim të Lartë dhe Hulumtime Suvit Maesincee.

Maesincee ka thënë se hulumtuesit shpresojnë se do të kenë më shumë të dhëna rreth efektit të vaksinës, deri në muajin shtator, raporton Rel.

“Ky projekt është për racën njerëzore, jo vetëm tajlandezët. Kryeministri (Prayuth Chan-ocha) ka theksuar politikën se ne duhet ta zbulojmë vaksinën dhe t’i bashkohemi komunitetit që po punon në këtë drejtim”, ka thënë Suvit para gazetarëve të shtunën.

Për vaksinën tajlandeze është përdorur acid ribonukleik, i cili shtyn qelizat e njeriut që të prodhojnë antigjene, të cilat e aktivizojnë sistemin imunitar.

Kjo vaksinë është një prej të paktën 100 tjerave për të cilat po punohet në botë kundër sëmundjes Covid-19, që shkakton koronavirusi.