Prindërit e një vajze 12 vjeçare vendosën një kamera të fshehtë në dhomën e gjumit të saj në përpjekje për të kapur në ‘flagrancë’ një të afërmin e tyre të rritur, për të cilin dyshonin se abuzonte seksualisht me të miturën.

Prindërit e vajzës pretendonin se e bija ishte abuzuar seksualisht dhe për këtë vendosën të krijonin një ‘kurth’ për abuzuesin në brendësi të shtëpisë së tyre në Moron, një provincë e Buenos Aires të Argjentinës.

Pamjet e marra nga kamera treguan të afërmin, të identifikuar si Leandro Sebastian Martinez, të hyjë në dhomën e gjumit të vajzës dhe ta prekë atë. Ajo më pas shihet teksa  i tregon burrit kamerat dhe 41 vjeçari shikon i hutuar drejtë lenteve.

Sipas mediave lokale, dyshimet kanë nisur që në vitin 2018, kur në telefonin e tyre mbërriti një mesazh në WhatsApp, teksa ata paralajmëroheshin nga një shok i klasës së vajzës në lidhje me abuzimin seksual nga i afërmi.

Madje shoku i klasës zbuloi dhe më shumë për familjarët, duke i treguar atyre se abuzuesi ishte Sebastian Martinez, një kushëri i afërt me babain e 12 vjeçares.

Fillimisht prindërit menduan që çështjen ta trajtonin tek psikologia e shkollës, por ata nuk ndërmorën asnjë veprim juridik ndaj të dyshuarit, në respekt të gruas së Sebastian, e cila gjatë asaj kohe ishte shtatzëne dhe i druheshin një përkeqësimi të mundshëm nëse skandali dilte sheshit.

Ndërkaq filmimet janë depozituar në polici, ndërkohë që hetimet janë duke vazhduar.