Në veri të Sirisë po zhvillohen luftime të ashpra, të cilat kanë provokuar një tjetër krizë refugjatësh në përmasa të mëdha. Sipas gazetës gjermane BILD, vetëm në dhjetë muajt e fundit janë larguar nga vendi 1.2 milionë sirianë. Bëhet fjalë kryesisht për rajonet Idlib dhe Aleppo.
Gazeta shkruan se vetëm javët e fundit, numri i refugjatëve është dyfishuar.
Në këto rajone të Sirisë po luftohet mes forcave rebele dhe atyre të ushtrisë qeveritare siriane.
BILD shkruan se bombat e Vladimir Putin, presidentit rus që përkrah liderin sirian Bashar al-Assad, po provokojnë një tjetër krizë të ngjashme me atë të vitit 2015. Në atë vit, qindra-mijëra refugjatë sirianë u dyndën në Gjermani.
A mund të përsëritet ky skenar? Gazeta shkruan se qeveria gjermane nuk po reagon akoma për këtë situatë të rëndë humanitare.
© SYRI.net