Kreu i të ashtuquajturit Shtetit Islamik, Abu Bakr al-Baghdadi, është shfaqur në një video propagandistike për herë të parë pas pesë vitesh, duke njohur humbjet e grupit terrorist në qytetin sirian Baghuz.

Pamja e tij është e dyta pas pamjes së parë që pas shfaqjes së grupit terrorist, dhe vjen në një kohë kur forcat e fundit të ISIS u larguan nga bastioni i tyre i fundit në shkretëtirën siriane. Bagdadi fajëson për rrënimin e grupit të “egërsinë” e të krishterëve.

Ulur këmbëkryq pranë një pushke Kalashnikov, ai flet për jo më shumë se 40 sekonda dhe duket se është i kufizuar në lëvizjet e tij, shkruan Guardian.

“Vërtetë, beteja e Islamit dhe popullit të saj kundër kryqit dhe popullit të saj është një betejë e gjatë”, thotë ai. “Beteja e Baghuzit ka mbaruar. Por kjo tregoi egërsinë, brutalitetin dhe synimet e sëmura të të krishterëve ndaj komunitetit mysliman “.

Ai ka lëshuar disa predikime audio vitet e fundit, e fundit prej të cilave ishte në gusht të vitit të kaluar, por mungesa e tij e gjatë kishte hedhur spekulime se mund të ishte dëmtuar nga plagët ose mund të ishte vrarë.

Në video, shkruhet edhe një tekst ku i referohet sulmeve të fundit në Sri Lanka, ku humbën jetën mbi 250 persona.

Planifikuesit e sulmit kanë pohuar besnikëri ndaj Isis, por mbetet e paqartë nëse grupi ka frymëzuar ose ka planifikuar drejtpërsëdrejti masakrën.

“Amerikanët dhe evropianët dështuan ndërsa u përgëzojmë vëllezërit tanë në Sri Lanka për besnikërinë ndaj halifatit“, thotë teksti. “Ne i këshillojmë ata të qëndrojnë në kauzën e Zotit dhe të unitetit dhe të jenë një gjemb në gjoks të kryqtarëve. Ne i kërkojmë Zotit të pranojë martirizimin e tyre dhe të ndihmojë vëllezërit të përmbushin udhëtimin që kanë nisur”.