Kryeministrja e Zelandës së Re ka bërë thirrje për një luftë globale për çrrënjosjen e ideologjisë raciste pas sulmit vdekjeprurës të javës së kaluar në dy xhami në Christchurch.

Në një intervistë për BBC, Jacinda Ardern hodhi poshtë idenë se rritja e emigracionit po nxit racizmin.

Ajo tha se: 'Kam përgjegjësi për të pastruar mjediset ku ekziston racizmi dhe të sigurohem që kurrë të mos krijojmë një mjedis ku mund të lulëzojë.

"Por unë do ta bëja një thirrje globale,"-shtoi kryeministrja. "Ajo që Zelanda e Re përjetoi ishte dhunë e ngritur kundër nesh nga dikush që u rrit dhe mësoi ideologjinë e tij diku tjetër. Nëse duam të sigurohemi globalisht për krijimin e një bote të sigurt, tolerante dhe gjithëpërfshirëse, ne nuk mund të mendojmë për këtë në aspektin e kufijve".

50 persona u vranë dhe dhjetëra të tjerë u plagosën në sulmet me armë të së premtes.

Funeralet e para, të një babai nga Siria dhe djalit të tij, u zhvilluan të mërkurën.

Qindra njerëz u mblodhën në një varrezë pranë Qendrës Islame Linëood në Christchurch, një nga dy vendet e adhurimit që ishte shënjestër e sulmuesit.