Autoritetet greke kanë thënë se rreth 74,000 azilkërkues tani po jetojnë në vend dhe po bëhen përpjekje për të zgjeruar strehimin për ta dhe për të përmirësuar kushtet në kampe.

Ministri i Migracionit Dimitris Vitsas tha se në muajt e ardhshëm rreth 6,000 njerëz do të zhvendosen në territorin e kampeve, ku kushtet janë kritikuar në mënyrë të përsëritur nga grupet e të drejtave të njerëzve, njoftoi AP.

Situata është "e vështirë" në këto kampe ku rreth 20,000 njerëz jetojnë në objekte të dizajnuara për më pak se 10,000, sipas Vitsas.

Këtë vit, rreth 42,000 emigrantë kanë hyrë ilegalisht në Greqi.

Ministri nuk pret një rritje të flukseve vitin e ardhshëm. Ai gjithashtu tha se numri i migrantëve që largohen nga Greqia ilegalisht për vendet e tjera evropiane është minimal.

/A.P/Syri.net/