Ministria e Jashtme e Kinës ka thënë se një bisedë telefonike në mes të presidentit të këtij shteti, Xi Jinping dhe homologut të tij amerikan, Donald Trump lidhur me çështjet tregtare dhe aspekte tjera ka qenë “jashtëzakonisht pozitive”, transmeton AP.

Ministria ka thënë të premten se të dy liderët janë pajtuar për të “fuqizuar shkëmbimin ekonomik”, mirëpo nuk kanë ofruar të dhëna nëse është shënuar ndonjë përparim në zgjidhjen e përshkallëzimit të luftës me tarifa mes këtyre dy shteteve.

Trump ka thënë më herët përmes një postimi në Tëitter se ai dhe Xi kanë pasur bisedë “shumë të mirë”.

Zëdhënësi i ministrisë së Jashtme, Lu Kang është pajtuar se “kjo bisedë telefonike ka qenë jashtëzakonisht e mirë”.

Shtetet e Bashkuara dhe Kina kanë tensionuar marrëdhëniet kohën e fundit për shkak të tarifave të vëna nga autoritetet amerikane në produktet kineze.

Kina po ashtu iu është kundërvënë hapave amerikanë, derisa presidenti Trump ka arsyetuar vendimin e tij për ndëshkim të Kinës duke përmendur ato që i ka cilësuar “praktika të padrejta tregtare” të këtij shteti kundrejt SHBA-së.

Shkrirja" e akujve mes SHBA dhe Kinës dha menjëherë efektin në bursat aziatike. 
Tokio e mbylli me një rritje me 2.56%, Seuli me 3.53%, Shanghai 2.7%, Shenzhen 3.43% ndërsa Hong Kongu, duke tregtuar ende në vazhdim, përparoi me 3.5%.

Për bursat aziatike ky është sesioni më i mirë që nga prilli 2016.