Nga të dhënat e shqyrtuara si dhe prej njoftimeve në media tashmë është informuar se dimri që po vjen do të jetë vërtet i ftohtë. Prej disa të dhënave të marra prej Eduard Halimit, i cili i referohet sipërmarrjeve me të cilat ka kontakte të vazhdueshme, rezulton se një pjesë e konsiderueshme e korporatave të fuqishme në Evropë kanë ‘fikur’ çelësin e energjisë elektrike duke pezulluar prodhimin e tyre.

Kështu sipas të dhënave referuar prej z.Halimi mbi disa prej industrive më të njohura në kontinent shihet se kriza e energjisë, korporatave e industrive ndodhet në prag!

Kriza energjetike në Evropë, ka filluar të mbyllë fabrikat një nga një. Efektet e luftës ekonomike po ndihen cdo ditë e më shumë! Edhe në Shqipëri, disa nga uzinat e shkrirjes dhe prodhimit, kanë ndalur aktivitetin e tyre, si rrjedhojë e çmimit të lartë të energjisë elektrike.

Megjithatë, në mediat tona, rrallëherë gjen lajme të asaj që po ndodh, pasi propaganda dhe kronika janë në vend të parë!

Si një kompani që jemi të lidhur me korporatat në fushat e metaleve, energjisë, hidrokabureve dhe naftës, informacionin e mbledhur ditëve të fundit dua ta ndaj disa të dhëna me lexuesit!

Vlerësohet se, afërsisht gjysma e fabrikave të aluminit dhe zinkut në Evropë janë mbyllur në këtë fillim shtatori!

1. “Nyrstar”, fabrika më e madhe e prodhimit të zinkut në botë, me qendër në Holandë, që zotërohet në pjesën më të madhe nga “Trafigura”, ndaloi prodhimin në shtator.

2. Fabrika e aluminit Damco Aluminium Delfzijl Coöperatie U.A. (ALDEL) në Delfzijl, Holandë, u mbyll javën e kaluar.

3. Fabrika e “Damco” në Farmsum, e cila prodhon alumin me cilësi të lartë, është mbyllur nga data 1 Shtator 2022, për shkak të çmimeve të larta të energjisë.

4. “Norsk Hydro” ASA, me qendër në Norvegji, planifikon të mbyllë fabrikën e saj të aluminit në Sllovaki në fund të muajit.

5. Kompania sllovene e aluminit “Talum” uli prodhimin në një të pestën e kapacitetit të saj.

6. “Alcoa” gjithashtu, një kompani me qender ne USA, do të reduktojë një linjë në fabrikën e saj Lista në Norvegji.

7. Kompania më e madhe në botë e plehrave kimike “Yara”, me seli në Norvegji, bëri një ulje prej 50 për qind në prodhimin e plehrave azotike me bazë ure dhe amoniak në Evropë.

8. Prodhuesi më i madh britanik i plehrave “CF Fertilizers UK” ka njoftuar gjithashtu se do të ndalojë përkohësisht prodhimin në fabrikën e tij në Billingham.

9. Dy prodhues të mëdhenj të plehrave në Poloni njoftuan se do të ndalojnë aktivitetet e tyre.

10. Kompania Gjermane kimike K+S vlerëson se kostot shtesë të karburantit janë miliona euro.

11. Fermerët, shitësit ushqimorë dhe prodhuesit e birrës në Evropë janë në panik. “Carlsberg Polska”, kompania e tretë më e madhe e birrës në Poloni, tha se planifikon të ndalojë prodhimin e birrës dhe prodhuesit e tjerë të birrës duhet të ndjekin shembullin.

12. Kriza e energjisë ka goditur gjithashtu fabrikat e çelikut dhe qelqit në të gjithë Evropën dhe shumë kompani që ndajnë/prodhojnë xhamin.

Silja Pieh, Përgjegjës për Strategjitë, e prodhuesit të makinave luksoze Audi AG, tha, duke përmendur xhamin si shembull se: “Ndërprerja e gazit nga Rusia në Gjermani do të shkaktojë një krizë të re të pjesëve. Jemi në mes të një krize!”

13. Kapaciteti i Evropës prej rreth 3 milion ton çelik inox është gjithashtu në rrezik. Në fillim të gushtit, mulliri Belg, “Aperam”, reduktoi prodhimin në Genk dhe Charleroi.

14. Kompania spanjolle “Acerinox” njoftoi se do të shkurtojë prodhimin dhe do të kalojë rreth 85 % të punonjësve të saj, në punë me kohë të shkurtuar.

15. Shumë kompani në Belgjikë duhej të mbyllnin objektet e tyre të prodhimit për shkak të çmimeve të larta të energjisë, kjo po ndodh cdo dite!

Në Shqipëri ende nuk ka lajme për “cunamin” ekonomik që po vjen! Por Korporatat duhet të marrin vendimet për atë po vjen! Të punësuarit, konsumatorët, duhet të përgatiten! Fermerët duhet të informohen! Shteti duhet të ketë një plan masash për këto që po ndodhin dhe ato që do të ndodhin!

Informacioni në këto kohë të ‘luftës ekonomike’ që po ndodh rreth nesh është tejet i rëndësishëm!

Duke qenë se të dhënat tregojnë jo vetëm vështriësi në furnizim me energji elektrike por dhe mungesë të saj, pyetja që shtrohet është: a do të preket arsimi në vend nga kriza energjetike?!

Gjithnjë duke pasur parasysh se një pjesë e madhe e qarqeve kanë shkolla në zona të thella, në të cilat ngrohja luan një rol kyç dhe mungesa e saj mund të shkaktojë mbyllje të këtyre shkollave. Por kjo analizë vlen edhe për qytetet…dimri është i ftohtë dhe për pasojë cikli i ulët dhe ai parauniversitar që e ka shumë të domosdoshme ngrohjen, por edhe energjinë elektrike për të ndriçuar klasat, e ka të pamundur të vijojë normalisht nëse të dyja këto gjëra mungojnë.