Nga Luçiano Boçi

Shpallja e zgjedhjeve në Universitete në mes zhegu është një rrufe në covid të pastër.

Edhe kësaj here ministria nuk befason. Përzien bashkë, dallkaullëkun me djallëzinë ekstreme, hipokrizinë me harbutërinë politike, padijen me poshtërsinë e ulët.

Pothuaj jemi mësuar tashmë me vendimet e saj kontroverse, pa kuptim dhe të imponuara nga makiavelizmi politik dhe grupesh interesi të pista.

Aq e ‘hutuar’ është ministria, sa nuk arrin as të rendisë në kohë datat e vendimeve të veta.

Vendimi nr. 104, dt 30. 04. 2020, ‘Për mbylljen e vitit akademik...’ përcakton afate paraqitjesh të studentëve për të gjitha vitet në auditore, pas datës 25 gusht.

Vetëm studentët e viteve të fundit janë deri në dt 7 gusht, por dhe këta mbarojnë provimet e lëndëve deri në 15 Korrik dhe i mbetet vetëm provimi i diplomës.

Praktikisht në dt 30 Korrik,  ka zero prani të studentëve në auditore dhe ka një disinteresim total të tyre për zgjedhjet në Universitete.

Kësisoj arsyeja themelore me të cilën u shtynë zgjedhjet e parashikuara më dt. 12 Qershor, pamundësia e studentëve për mos shprehjen e vullnetit të tyre, qëndron akoma.

Situata e krijuar prej këtij urdhëri është në kufijtë e antikushtetuetshmërisë dhe paligjshmërisë.

Ligji për arsimin e lartë parashikon qartë dhe njeh studentët si palë themelore në zgjedhje. Sipas tij studentët e universiteteve publike zgjedhin përfaqësuesit e tyre në Senatin Akademik, votojnë për rektorët dhe dekanët, dhe vota e tyre llogaritet në masën 10 për qind të votave të përgjithshme.

E drejta për të zgjedhur dhe për t’u zgjedhur e studentëve është e garantuar jo nga vetë ligji për arsimin e lartë, por dhe nga Kushtetuta.

Ndërkohë aktualisht, realizimi i kësaj të drejtë nga studentët është i pamundur dhe farsa e zgjedhjeve nuk mund të ekzekutohet.

Pa studentët dhe pa një pjesë të madhe të pedagogëve, për shkak të protokolleve të pandemisë, kandidatët nuk mund të ushtrojnë të drejtën e një gare reale dhe të barabartë.

Një proces pa një palë zgjedhësish, nuk mund të funksionojë. Ato mbeten thjesht ca palo zgjedhje.

Jo vetëm kaq. Nuk është vetëm mungesa e studentëve që i kthen këto zgjedhje në palo zgjedhje.

Vendimi nr. 175, dt 30. 06. 2020,  i cili përcakton dt 30 Korrik si datë zgjedhjesh, ka dhe një pikë diabolike, që hedh në erë procesin zgjedhor.

Pika 3 e urdhërit, sanksionin procesin fals të regjistrimit të kandidatëve, të kryer para daljes së tij. Kjo ‘njohje’ që ngjan si e pafajshme, por që është krejt antiligjore dhe e pamoralshme, përmbledh në vetvete dhe thelbin e nxitimit për të realizuar zgjedhjet pa studentë në dt 30 Korrik.

Urdhëri e quan të mbyllur procesin e regjistrimit të kandidatëve, duke bllokuar kandidimet. Shumë gara kësisoj do jenë vetëm me një kandidat të preferuar politikisht dhe garat e votimet do jenë thjesht një formalitet i pështirë.

Ky urdhër bie ndesh, jo vetëm me kushtetutën dhe ligjet e urdhërat e tjerë të vetë ministrisë, por ka dhe kundështi brenda pikave të tij.

Rama dhe Shahini me këtë urdhër kërkojnë të vendosin në drejtim të universiteteve, ushtarë politikë dhe shkatërrojnë përfundimisht institucionin e zgjedhjeve në akademizëm.

Në panik e ikje e sipër, ata po i shndërrojnë Universitetet në territore të kontrolluara prej tyre sipas filozofisë tashmë të instaluar qeverisëse ‘kap çfarë të kapësh’.

Palo zgjedhjet e Universiteteve nuk duhen vëzhguar dhe thjesht kritikuar. Ato duhen ndalur.

Përndryshe ato do jenë një model i frikshëm për proceset e afërta zgjedhore politike.