Këngëtari me famë botërore Jason Derulo ka mbërritur në Tiranë për të mbajtur një koncert me hitet ndër vite dhe produksionet e reja muzikore.

Derulo është i emocionuar për eventin, i cili do të jetë sipas tij ndryshe nga koncertet e turet, që i ka mbajtur nëpër botë.

Këngëtari foli për Syri TV për bashkëpunimin e shumëdëgjuar me Majkëll Buble-në, ndërsa u tregua entuziast për të pasur duete me këngëtaret shqiptare me famë ndërkombëtare.

Një nga këngëtarët më të dashur nga shijuesit e muzikës në botën mbarë, Derulo, ka mbërritur në Tiranë për të mbajtur një koncert, që do t’i kalojë kufijtë e realitetit për nga atmosfera, që pritet të krijojë në stadiumin “Selman Stermasi”. 

Derulo zbuloi për gazetaren e Syri TV, Egla Xhemalaj, se si është konceptuar organizimi, ndërsa publiku do të udhëtojë bashkë me të drejt hiteve të dikurshme e deri te produksionet e sotme. 

“Do të jem së bashku me disa këngëtarë, më të mirët nga mbarë bota e me disa kërcimtarë. Do të jetë vërtet një super show . Unë mendoj që do të jetë një koncert shumë special, ndryshe nga ata në të cilët kam performuar deri më tani. Do performoj disa nga hitet e mia, që do ta kthejnë publikun në të shkuarën, por gjithashtu do të interpretoj edhe këngë të reja. E di që publiku do të këndojë së bashku me mua”.

I rikthyer në Shqipëri, Jason Derulo çmon njerëzit, frymën e mirë dhe ushqimin.

“Kam qenë në Shqipëri edhe më parë. Kam kaluar një kohë të bukur këtu. Vendi juaj ka njerëz me shpirt dhe fizik të bukur. E di çfarë më pret edhe këtë herë. Ajo që më pëlqen tjetër është ushqimi. Pata një përvojë të jashtëzakonshme me ushqimin sot”.

 Energjia e pashtershme e këngëtarit që ka elektrizuar mijëra të pranishëm nëpër koncerte, do të takohet me artdashësit shqiptarë, që mezi e kanë pritur këtë event, ndërsa këngëtari tregon më shumë për bashkëpunimin me Majkëll Buble dhe këngën Spicy Margarita.

“Majkëll Buble mbetet një nga këngëtarët e mi më të parapëlqyer. Megjithëse kemi ide të ndryshme për këngë të ndryshme, ndonjëherë kur dëgjon një produksion muzikor për herë të parë thua oh tingëllon për bukuri. Bashkëpunimi ishte pak ndryshe sepse ai ma dha idenë. Ai tha Jejson je gjeni. Kështu ndodhi bashkëpunim i jashtëzakonshëm, erdhi në kohën e duhur. Mendoj që është një nga njerëzit më të mirë në planet”.

Jason Derulo tregohet entuziast për të pasur duete me këngëtaret shqiptare me famë ndërkombëtare.

“Me Ritën isha në "The voice" në Austri. Shpenzuam një kohë të mirë atje.  Beben e njoh, por nuk kam pasur fatin ta takoj nga afër. Ku i dihet me këngën e duhur, në kohën e duhur pse jo do të bashkëpunoja me këngëtaret shqiptare për të sjellë hite”.

Koncerti i Jason Derulos do të mbahet këtë të premte në stadiumin “Selman Sermasi”, ndërsa këngëtari premton një mbrëmje të paharrueshme për shqiptarët.