Pas një beteje të gjatë me sëmundjen, është ndarë nga jeta piktori i njohur nga Korça, Koço Ristani.
Lajmi i trishtë është bërë i ditur nga familjarët e tij. Koço Ristani, ishte një artist origjinal që vërtetësinë e figurës njerëzore diti ta interpretojë artistikisht, duke vendosur aty frymëzimin e tij, me një etikë estetike bashkëkohore.
Koç Ristani ka lënë mbresa të forta e të pashlyeshme në të gjitha vendet ku kaloi dhe u ekspozuan veprat e tij, si në Rusi, Suedi, Gjermani, Greqi e Maqedoni.
Natyrat e qeta që dalin nga furça e piktorit kanë sjellë peisazhet e rrugëve karakteristike të Korçës, brigjet e Liqenit të Pogradecit apo pemishtet ngjyrë ari të vjeshtës. Një lirizëm poetik. Teknika e pastelit e ka ndihmuar piktorin të zhbirojë në thellësi shpirtin e ngrohtë të njeriut dhe të natyrës përreth tij.
Teknika e Pastelit është më tepër se kushdo tjetër më afër impresionizmit dhe kjo i bën krijimet e Koço Ristanit sa origjinale, aq edhe të bukura.
© SYRI.net