BALIT, MONUMENT
Fazli Jakupi – Bali, ushtar i brigadës ‘114 - Fehmi Lladrovci’, ra dëshmor me 23 maj 1999 në një përballje frontale të përgjakshme me forcat serbe në fshatin Dashevc të Skënderajt)
Flokun ia shprish krisma
E mbi vetull i bie
Nën vallen e vdekjes
Këndon për lirinë
Buzëqeshje e ëmbël
I ka rënë në buzë
Jehona e zëri
Nuk do t’i vdesin kurrë
As shiu që bie
As vala që rrëmben
Nuk do ia prishin lirinë
Fazliut të vogël
As Balit...monument!
AKROSTIK PËR TRIMIN
Muhamet Jakupi nga Baksi i Skenderajt, kishte shumë ëndrra për jetën por armiku nuk e pyeti, dhe kur ishte vetëm 16-vjeç u vra nga forcat serbe në fshatin Dashevc, ku bashkë me të nga plagët e marra vdiq edhe babai i tij, Haxhiu.
Dritëz e mëngjesit zbardhi
E rrezja ftohej ngadalë
Shpejt qielli u bë gri
Moti krisi si dikur...moti
Ora e stuhisë pikohej
Ra trumbeta...
I njomë buzë jetë-vdekjes
Terri e mbuloi në fytyrë
Maji i lulëkuqeve
U tret përsëri
Humbi buzagazi
As frymë e heshtur
Më nuk flet
E klithma ikën tok
Tehut të vdekjes
Jeta iu bë varr
Atdheu libër nën sqetull
Këngë funebre kumtoi
U fik gëzimi fëmijëror
Por rilindi në poezi
I vogël madhështor të lapidari
Trimi pavdekësinë jeton
© SYRI.net