Raportet në çift nuk kanë qenë kurrë të lehta. Komedia ‘Kukulla’ trajton këtë marrëdhënie komplekse, midis një burri dhe një gruaje kukull, që në fund jep rezultatin e dëshiruar. Stela zhvesh realitetin e gënjeshtërt, për t’i hapur sytë Markos, i cili bëhet njeri më i mirë falë gruas-kukull. Shfaqja i flet realitetit në Shqipëri. 

Nga SYRI TV

Gratë janë ankuar gjithmonë për disa tipare të meshkujve. Humori i hollë e situatat dramatike në komedinë ‘Kukulla’ i njohin shijuesit e teatrit me një çift jo të zakonshëm,  historia e të cilit nis fill pas ndarjes së Markos nga lidhja 7 vjeçare me Marian, për shkak të hezitimit të tij për martesën dhe fëmijën që dëshironte ajo.

Marko vetmitar, i lënduar thellë fillon të jetojë me një grua- kukull e krijuar për të përmbushur dëshirat e mashkullit, por ajo që I dha jetë Stelës qe një shkencëtare grua. Vështrimi regjisorial i Elma Doresit i flet realitetit në Shqipëri.

Një grua-kukull që e ngre zërin ndaj padrejtësive, që s’pranon nënshtrimin, fuqia e Stelës ngrihet përmbi Markon, për të treguar forcë e vetëbesim, që e shpie të dashurin e saj drejt reflektimit.

Marrëdhënia nis si një lojë e bukur, ndërsa egoizmi dhe dëshira për ta quajtur gruan si pronë, shkatërron gjithçka.

Në jetë asgjë nuk duhet marrë e mirëqenë, për sa kohë nuk luftohet çdo ditë. Komedia ‘Kukulla’ do të vijojë të ngjitet në skenën e Ar Turbinës, ndërsa publiku nuk duhet të humbasë skenat plot batuta e drama në shtëpizën e çiftit.