Qeveria: Banorët në Himarë do kompensohen me vlerën e tregut
Qeveria nuk do tw tërhiqet nga plani vendor për ndërtimin e shëtitores së Himarës, projekt i cili prek disa banesa të vjetra.
Ministrat Damian Gjiknuri dhe Mirela Kumbaro zhvilluan sot një takim me një përfaqësi të banorëve himariotë në Vlorë.
Takimi u zhvillua me dyer të mbyllura, ndërsa morën pjesë edhe krerët e Omonias, Vasil Bollano dhe Fredi Beleri.
Ministri i Energjisë dhe Infrastrukturës, Damian Gjiknuri deklaroi se banorët të cilët preken nga ky projekt do kompensohen me vlerën e tregut.
“Do bëhen kompensime dhe dëmshpërblimet për çdo banesë e cila preket nga zbatimi i këtij projekti. Banorët do kompensohen me vlerën e tregut”, ka deklaruar Gjiknuri në këtë takim.
Palët kanë rënë dakord për të zhvilluar edhe një takim tjetër të premten e ardhshme.
Plani vendor i Himarës prek rreth 80 banesa përgjatë shëtitores e cila parashikohet të shtrihet deri në Potam.
Kjo çështje është shndërruar edhe në mollë sherri mes Tiranës dhe Athinës.