Ndalim drejtimi për kamion me defekt në A93 në Gjermani: Shoferi shqiptar nuk ndalon dhe shkakton aksident

Një shofer 24-vjeçar shqiptar është vënë në qendër të një incidenti të pazakontë në autostradën A93, pranë Kiefersfelden në Gjermani, pasi shpërfilli urdhrin e policisë për të mos vazhduar udhëtimin me kamionin e tij, i cili kishte defekte të rënda teknike.

Sipas autoriteteve gjermane, gjithçka nisi të martën, kur kamioni me targa greke u ndal për kontroll në pikën kufitare. Gjatë inspektimit, efektivët e Policisë Federale konstatuan probleme serioze teknike dhe kërkuan ndërhyrjen e specialistëve të Policisë Rrugore të Rosenheimit.

Kontrolli teknik zbuloi një sërë defektesh të rënda, mes tyre xham të përparmë të plasaritur, ndriçim pjesërisht jashtë funksionit, mbulesë radiatori të palidhur siç duhet, si dhe elementë të kabinës që rrezikonin të shkëputeshin gjatë lëvizjes.

Edhe rimorkioja rezultoi në gjendje të rënduar teknike. Specialistët konstatuan bulona të liruar në rrota, një gomë të shpuar nga një gozhdë, ngarkesë të pasiguruar siç duhet, rripa fiksues të dëmtuar ose të lirshëm, dysheme të ndryshkura, amortizatorë ajri të konsumuar dhe dëmtime të shumta të tjera që e bënin mjetin të rrezikshëm për qarkullim.

Për shkak të numrit dhe seriozitetit të defekteve, policia ndaloi vazhdimin e udhëtimit, sekuestroi targat greke të kamionit dhe i vendosi shoferit një garanci financiare prej disa qindra eurosh për procedurën administrative. Sipas ekspertëve, rimorkioja nuk mund të riparohet më në mënyrë ekonomike dhe duhet të transportohet me mjet të posaçëm.

Megjithatë, një ditë më vonë, kur efektivët u rikthyen në zonën e kontrollit, konstatuan se kamioni ishte larguar, pavarësisht ndalimit të vendosur nga autoritetet.

Pas kërkimeve në zonë, mjeti u gjet në një tjetër parking të autostradës, kësaj here pa targa. Policia vuri re gjithashtu dëmtime të reja në pjesën e pasme të kamionit.

Fillimisht, shoferi mohoi të ishte përfshirë në ndonjë aksident, por më pas pranoi se gjatë një manovre mbrapa kishte goditur një barrierë metalike. Ai mblodhi copat e dritës së pasme të thyer dhe u largua nga vendi i ngjarjes pa njoftuar autoritetet.

Si pasojë e aksidentit, barriera pësoi dëme materiale që vlerësohen në disa mijëra euro.

Me urdhër të Prokurorisë, ndaj 24-vjeçarit u vendos një tjetër garanci financiare për dyshimet se është larguar nga vendi i aksidentit. Gjithashtu, autoritetet njoftuan se shkeljet e konstatuara një ditë më parë do të trajtohen si të kryera me dashje, pasi ai injoroi ndalimin e qarkullimit, çka pritet të sjellë një gjobë edhe më të lartë.