AFP: Policia përdor gaz lotsjellës kundër protestuesve, 4 mln eurot për Kanye West revoltuan qytetarët
Mediat ndërkombëtare po i bëjnë jehonë protestës së sotme përpara Kuvendit. Agjencia e njohur AFP shkruan se policia përdori edhe gaz lotsjellës kundër protestuesve
Policia shqiptare përdori gaz lotsjellës dhe topa uji kundër protestuesve jashtë Parlamentit të enjten në mëngjes, ndërsa kundërshtimi ndaj një projekti turistik të lidhur me familjen Trump vazhdon të përfshijë vendin.
Që nga fundi i muajit maj, janë zhvilluar protesta kundër ndërtimit të planifikuar të një hoteli luksoz, i lidhur me vajzën e Donald Trump, Ivanka Trump, dhe bashkëshortin e saj, Jared Kushner, në një rezervat natyror në bregdetin shqiptar.
Gjatë javëve të fundit, disa protesta janë shoqëruar edhe me përplasje mes protestuesve dhe policisë jashtë Parlamentit në Tiranë, ku demonstruesit janë përpjekur të godasin deputetët me vezë.
Të enjten, policia kishte vendosur një prani të madhe që në orët e para të mëngjesit dhe përdori topa uji dhe gaz lotsjellës, ndërsa protestuesit u përpoqën të çanin kordonët e sigurisë për t'iu afruar Parlamentit, raportuan gazetarët e AFP-së nga vendngjarja.
Protesta e fundit u zhvillua në të njëjtën ditë kur Parlamenti pritej të miratonte një subvencion prej 4 milionë eurosh (rreth 4.6 milionë dollarë) për koncertin e Kanye West, të mbajtur në Tiranë në fillim të këtij muaji.
Kryeministri Edi Rama e justifikoi financimin duke thënë se ai ishte i nevojshëm për të parandaluar anulimin e koncertit.
Ky vendim zemëroi edhe më shumë protestuesit, të cilët prej më shumë se një muaji kishin dalë në rrugë për shkak të projektit të resortit, që tashmë është kthyer në një simbol të shqetësimeve për korrupsionin e perceptuar dhe mungesën e transparencës së qeverisë.
Kompleksi turistik luksoz, i planifikuar në një zonë të mbrojtur dhe në një ishull të pabanuar aty pranë, ka tërhequr turma të mëdha protestuesish dhe vëmendje ndërkombëtare për shkak të shqetësimeve mjedisore dhe lidhjeve të tij me familjen Trump.
Nuk janë publikuar shifra zyrtare për pjesëmarrjen në protestat e përnatshme, por gazetarët e AFP-së që kanë qenë të pranishëm në terren vlerësojnë se deri të paktën në mesin e korrikut, në protesta merrnin pjesë mijëra persona.