PSG synon heroin e Botërorit, gati ofertë joshëse për yllin e Barcelonës

Goli që i dha Spanjës fitoren 1-0 ndaj Argjentinës në finalen e Botërorit 2026 mund të ketë ndryshuar përfundimisht karrierën e Ferran Torresit. Sulmuesi 26-vjeçar është kthyer në një nga emrat më të kërkuar të merkatos, ndërsa Paris Saint-Germain është gati të bëjë gjithçka për ta transferuar në Francë.

Sipas Sport, Barcelona dëshiron ta mbajë në skuadër sulmuesin spanjoll, por vonesa në negociatat për rinovimin e kontratës, e cila skadon në vitin 2027, ka komplikuar situatën. Drejtuesit katalanas kishin vendosur ta shtynin çështjen deri në shtator, fillimisht për të zgjidhur të ardhmen e Robert Lewandowski-t, i cili më pas u transferua te Chicago Fire, si dhe për të shmangur pagesën e një bonusi prej 8 milionë eurosh ndaj Manchester City-t.

Ky ngërç ka hapur rrugën për klubet e mëdha evropiane, me PSG-në që po tregohet më këmbëngulëse. Sipas raportimeve, Ferran Torres është ndier i nënvlerësuar nga Barcelona, pasi drejtuesit nuk i kanë dhënë besimin e plotë si qendërsulmues. Edhe zërat për një transferim të mundshëm të Julián Álvarez-it janë interpretuar nga lojtari si një shenjë se klubi po kërkon alternativa.

Trajneri i PSG-së, Luis Enrique, e konsideron Torresin profilin ideal për të përforcuar repartin ofensiv pas largimit të Gonçalo Ramos dhe ka dhënë miratimin për nisjen e operacionit. Kampionët e Francës po përgatisin një ofertë shumë të favorshme, si në aspektin financiar ashtu edhe në atë sportiv, me synimin për ta bindur spanjollin të largohet nga "Camp Nou".

Ende nuk ka një marrëveshje mes palëve, pasi PSG synon fillimisht të sigurojë pëlqimin e lojtarit dhe më pas të negociojë me Barcelonën. Klubi katalanas e vlerëson Ferran Torresin rreth 50 milionë euro, një shifër që francezët e konsiderojnë të lartë për një futbollist që i afrohet vitit të fundit të kontratës. Megjithatë, Barcelona vazhdon të shpresojë te rinovimi, edhe pse për të qëndruar, Ferran Torres do të duhet të pranojë një ulje të ndjeshme të pagës dhe pa garanci për një vend titullari.