Italia përballet me konkurrencën e Anglisë për Pep Guardiolën, ‘Tre Luanët’ i ofrojnë stolin e kombëtares

Italia po pret përgjigjen e Pep Guardiolës, pasi ish-trajneri i Manchester City-t ka zhvilluar bisedime me drejtues të Federatës Italiane të Futbollit për mundësinë e marrjes së drejtimit të kombëtares së kaltër.

Sipas raportimeve, drejtuesit e rinj teknikë të Italisë, Paolo Maldini dhe Leonardo, kanë udhëtuar drejt Barcelonës për një takim privat me Guardiolën, ku i kanë paraqitur vizionin e tyre për të ardhmen e përfaqësueses italiane.

Federata Italiane është e vendosur të bindë trajnerin katalanas që të marrë drejtimin e kombëtares dhe beson se përvoja e tij e madhe dhe filozofia taktike mund të ndihmojnë në rindërtimin e skuadrës.

Megjithatë, Italia tashmë përballet me konkurrencën e Anglisë. Sipas gazetës italiane “La Repubblica”, Federata Angleze e Futbollit i ka ofruar Guardiolës postin e trajnerit të kombëtares së “Tre Luanëve” duke nisur nga viti i ardhshëm.

Guardiola, i cili u largua nga posti i trajnerit të Manchester City-t pas një dekade të suksesshme në krye të klubit anglez, ende nuk ka vendosur për hapin e tij të ardhshëm në karrierë. Trajneri spanjoll raportohet se po shqyrton të dyja mundësitë: drejtimin e Italisë ose atë të Anglisë.

Për momentin, gara për të siguruar shërbimet e një prej trajnerëve më të suksesshëm të brezit të fundit mbetet e hapur, me dy kombëtare të mëdha evropiane që shpresojnë ta bindin Guardiolën për projektet e tyre të së ardhmes.