Edhe pse Spanja fitoi Botërorin, presidenti i La Ligës sulmon FIFA-n/ Tebas: Infantino duhet të largohet!

Presidenti i La Ligës, Javier Tebas, është rikthyer në sulmin e tij ndaj FIFA-s dhe presidentit të saj, Xhani Infantino.

I intervistuar nga “La Gazzetta dello Sport” pas Kupës së Botës, zyrtari spanjoll kritikoi ashpër disa vendime të marra gjatë turneut, duke akuzuar federatën ndërkombëtare se po vepron vetëm në interesat e veta dhe po injoron nevojat e futbollit në tërësi.

Tebas nuk i kursen fjalët kur analizon disa nga vendimet e marra gjatë Kupës së Botës: “FIFA i bën gjërat siç dëshiron, për atë që dëshiron, për interesat e veta, sigurisht jo për futbollin. Nëse u duhet një pushim 27-minutësh, e bëjnë. Pushimet për hidratim janë gënjeshtër. I kemi në La Liga, por vetëm kur është shumë vapë. Këtu, fushat në Dallas, Los Angeles dhe Atlanta kishin ajër të kondicionuar, më duhej të vishja një bluzë në tribuna. Ishte gënjeshtër, një pushim reklamash”.

Lidhur me rastin e Balogun, ai shtoi: “Kjo tregon se ne qeverisemi nga një institucion që bën dhe vendos çfarë dëshiron kur dëshiron, duke ndjekur vetëm interesat e veta pa marrë parasysh pjesën tjetër të futbollit”.

Më vonë gjatë intervistës, Tebas kritikoi gjithashtu menaxhimin e kalendarit ndërkombëtar dhe planin për një Kupë Bote me 64 ekipe: “Ata po e shkatërrojnë industrinë e futbollit. Gara kombëtare janë ato që e mbajnë këtë sport, dhe ne kemi nevojë për më pak ekipe kombëtare, jo më shumë”.

Së fundmi, ai mori një qëndrim të qartë për presidentin e FIFA-s: “Sipas mendimit tim, Infantino duhet të largohet, koha e tij ka kaluar. Por ai ka mbështetjen e sistemit dhe të federatave. Kam dëgjuar shumë njerëz kundër tij këto ditë, por askush nuk bën asgjë. Nuk e di se cila është më e keqe, heshtja apo bashkëfajësia, sepse ata që heshtin janë plotësisht të vetëdijshëm për dëmin që po pëson futbolli”.