Rubio: SHBA-të mbeten të hapura për diplomaci me Iranin

Sekretari amerikan i Shtetit, Marco Rubio, tha se Shtetet e Bashkuara të Amerikës (SHBA) mbeten të hapura për diplomaci me Iranin, edhe pse ky i fundit ka intensifikuar sulmet ushtarake për natën e nëntë radhazi, shkruan sot New York Times.

"Ne kemi provuar shumë herë me Iranin dhe do të vazhdojmë të përpiqemi. Nëse ajo derë hapet, do të jemi të lumtur ta shohim të hapur", u tha Rubio gazetarëve në Bazën Ajrore Andrews në Maryland përpara se të udhëtonte për në samitin e Shoqatës së Kombeve të Azisë Juglindore në Manila.

Megjithatë, shtoi ai, sjellja e Iranit duhet të ndryshojë në mënyrë që të ndryshojë edhe sjellja e Amerikës.

Rubio gjithashtu pretendon se Irani ka vazhduar t’i dërgojë sinjale SHBA-së se dëshiron të negociojë, duke deklaruar se e bën këtë si drejtpërdrejt ashtu edhe nëpërmjet vendeve ndërmjetëse.

Rubio nuk dha detaje rreth kësaj, dhe javën e kaluar, siç vëren New York Times, nuk pati shenja publike të diplomacisë, por të dyja palët i intensifikuan sulmet dhe nuk ka asnjë tregues se do t'i ndalin ato.

Sipas tij, sulmet iraniane ndaj anijeve në Ngushticën e Hormuzit janë një shkelje e Memorandumit të Mirëkuptimit me SHBA-në, të nënshkruar në qershor.