10 mistere historike që ende nuk janë shpjeguar

Misteret janë gjithmonë tërheqëse, ato ndërthurin intrigën, pezullin dhe paqartësinë në një mënyrë që zgjon kureshtjen tonë. Historia është plot me ngjarje të pazgjidhura që kanë sfiduar ekspertët për shekuj me radhë. Ja dhjetë nga më magjepsëset.

1. A ekzistonin vërtet Kopshtet e Varura të Babilonisë?

Nga shtatë mrekullitë e botës së lashtë të përshkruara nga grekët, vetëm Piramida e Madhe e Gizës ka mbijetuar, ndërsa arkeologët kanë vërtetuar se pesë të tjerat kanë ekzistuar dikur. Përjashtim bëjnë Kopshtet e Varura. Legjenda thotë se ato u ndërtuan nga mbreti neo-babilonas Nebukadnetsari si dhuratë për gruan e tij, Amitisin. Megjithatë, as kopshtet dhe as mbretëresha nuk përmenden në dokumentet babilonase, ndërsa historiani Herodoti nuk i përmend fare. Disa studiues mendojnë se autorët e lashtë ngatërruan babilonasit me asirianët dhe në të vërtetë po përshkruanin kopshtet e mbretit Senakerib në Ninive. Të tjerë besojnë se kopshtet e vërteta ende ndodhen të varrosura, ndoshta pranë lumit Eufrat.

2. Çfarë ndodhi me Legjionin e Nëntë Romak?

I formuar në shekullin e parë para Krishtit, ky legjion mori pjesë në pushtimin e Britanisë, i mbijetoi kryengritjes së Budikës dhe më vonë luftoi në pushtimin e Britanisë veriore. Një mbishkrim i vitit 108 pas Krishtit e vendos atë në Jork, por pas kësaj zhduket nga të gjitha burimet historike. Një teori thotë se u shkatërrua në Skoci, ide e bërë e famshme nga romani Shqiponja e Legjionit të Nëntë. Një tjetër sugjeron se u tërhoq në Europë, duke u bazuar në prova se komandanti i tij ndërtoi një monument në Ahen të Gjermanisë. E vetmja gjë që dihet me siguri është se gjatë sundimit të perandorit Septimius Severus, legjioni nuk ekzistonte më.

3. Ku ndodhen stolitë mbretërore të mbretit Xhon?

Mbreti Xhon, pasardhësi jopopullor i Riçard Zemërluanit, u detyrua të nënshkruante Magna Kartën dhe muajt e fundit të jetës i kaloi duke luftuar kundër rebelëve dhe francezëve. Në tetor të vitit 1216, i sëmurë rëndë, ai udhëtoi nëpër Norfolk me një karvan që transportonte stolitë mbretërore. Sipas legjendës, qerret u fundosën në rërë thithëse pranë vendit që sot quhet Sutton Bridge, në Linkolnshir. Xhoni vdiq pak më vonë në Kështjellën e Njuarkut dhe stolitë nuk janë gjetur kurrë.

4. Ku ndodhet varri i Xhingis Khanit?

Themeluesi i Perandorisë Mongole sundoi një territor që shtrihej nga Deti i Japonisë deri në Detin Kaspik, por edhe vdekja e tij mbetet e paqartë. Disa thonë se vdiq pasi ra nga kali, të tjerë se u plagos nga një shigjetë. Edhe vendi i varrimit të tij është mister. Disa besojnë se trupi u kthye pranë vendlindjes së tij, afër malit Burkhan Khaldun në Mongoli, ndërsa të tjerë mendojnë se varri ndodhet në Shkretëtirën Ordos. Zbulimi i tij mund të nxirrte në dritë jo vetëm thesare, por edhe njohuri të reja për besimet fetare të mongolëve të shekullit XIII.

5. Çfarë ndodhi me koloninë e Roanokes?

Në vitin 1587, tregtari anglez Xhon Uajt la më shumë se 100 kolonë në ishullin e Roanokes dhe u kthye në Angli për të marrë furnizime. Lufta me Spanjën ia vonoi kthimin për tre vjet. Kur më në fund u rikthye, të gjithë kolonët ishin zhdukur. Kishin mbetur vetëm disa gjurmë këmbësh dhe fjala "CROATOAN" e gdhendur në një pemë. Disa besojnë se fisi miqësor Kroatoan u fajësua padrejtësisht për një sulm të kryer nga të tjerë. Të tjerë dyshojnë për një kurth të organizuar, ndërsa disa mendojnë se kolonët u mbytën duke u përpjekur të ktheheshin me anije në shtëpi.

6. Kush ishte Njeriu me Maskën e Hekurt?

Në vitin 1698, një i burgosur misterioz mbërriti në Bastijë, pasi kishte kaluar tashmë disa dekada në robëri me fytyrën e mbuluar që nga vitet 1660. Rrobat e tij elegante dhe aftësia për të luajtur kitarë sugjeronin se kishte prejardhje fisnike, por identiteti i tij u zhduk bashkë me të, pesë vjet më vonë. Ekzistojnë shumë teori, shumica të lidhura me familjen mbretërore franceze. Disa mendojnë se ishte djali i paligjshëm i mbretëreshës, ndërsa të tjerë madje pretendojnë se ishte një grua e maskuar si burrë, pasi mbreti dyshohet se kishte zëvendësuar vajzën e tij me djalin e dikujt tjetër.

7. Çfarë ishte Bisha e Zhevodanit?

Duke filluar nga viti 1764, një krijesë e frikshme, ndoshta një ujk jashtëzakonisht i madh, terrorizoi zonat rurale të Francës. Viktima e parë ishte një vajzë 14-vjeçare, ndërsa më pas shumë të tjerë u vranë ose u gjymtuan. Mbreti dërgoi gjuetarë dhe një ujk i madh u vra e u dërgua në Versajë, por sulmet rifilluan vetëm dy muaj më vonë. Më në fund, një fermer vendas e vrau krijesën në vitin 1767. Shumica e historianëve besojnë se përgjegjës ishin disa ujq, megjithëse disa kanë hedhur idenë se mund të ketë qenë një luan i arratisur.

8. Çfarë ndodhi me ekuipazhin e Mary Celeste-s?

Pas një historie të trazuar me një emër tjetër, anija Mary Celeste u nis për në Gjenovë në vitin 1872, e ngarkuar me fuçi alkooli. Ajo u gjet duke lundruar pa drejtim pranë Ishujve Azore, e braktisur, me velat e dëmtuara, pa ekuipazh dhe pa ditarin e kapitenit. Varka e shpëtimit dukej se ishte përdorur qëllimisht, por furnizimet dhe vetë anija ishin të paprekura. Një teori thotë se një shpërthim i avujve të alkoolit i trembi marinarët dhe i detyroi të largoheshin. Një tjetër pretendon se kapiteni i anijes që e zbuloi bashkëpunoi me kapitenin e Mary Celeste-s për të ndarë paratë e shpëtimit. Asnjëra teori nuk është provuar.

9. Kush ishte Xhek Rrjepësi?

Vrasësi serial më famëkeq i Britanisë vrau disa gra në lagjen Uajtçepëll gjatë epokës viktoriane, duke ua prerë fillimisht fytin dhe më pas duke ua gjymtuar trupat. Mes të dyshuarve është Aaron Kozminski, një berber me origjinë polake që më vonë u shtrua në një institucion psikiatrik, por nuk u akuzua kurrë. Një teori shumë e pabesueshme madje përmend shkrimtarin Luis Kerroll si autorin e krimeve, duke u mbështetur në anagrame të dyshimta si "prova", një pretendim që pothuajse askush nuk e merr seriozisht.

10. Çfarë ndodhi në të vërtetë me kryeministrin australian?

Harold Holt u zhduk me 17 dhjetor të vitit 1967, teksa notonte në plazhin Çeviot, dhe nuk u gjet kurrë, pavarësisht një operacioni gjigant kërkimi gjashtëditor me zhytës dhe helikopterë. Shpjegimi më i mundshëm është se u mbyt, qoftë aksidentalisht apo qëllimisht, megjithëse fakti që ishte jopopullor ka ushqyer spekulimet për vetëvrasje. Një teori edhe më e çuditshme, e paraqitur nga gazetari Antony Grey në librin The Prime Minister Was a Spy, pretendonte se Holt inskenoi vdekjen e tij për t'u arratisur në Kinë me nëndetëse. Kjo histori është tallur pothuajse që në momentin kur u publikua. / Medium – Syri.net