Scaloni hyn në histori, trajneri i shtatë që arrin dy finale të Kupës së Botës

Lionel Scaloni vazhdon të shkruajë historinë me Argjentinën. Pas fitores dramatike 2-1 ndaj Anglisë në gjysmëfinalen e Botërorit 2026, trajneri argjentinas u bë vetëm i shtati në historinë e futbollit që arrin të drejtojë kombëtaren e tij në dy finale të Kupës së Botës.

Në sfidën e zhvilluar në stadiumin e Atlantës, Anglia kaloi e para në avantazh me Anthony Gordon në minutën e 55-të, por kampionët në fuqi reaguan në fundin e takimit. Enzo Fernandez barazoi rezultatin, ndërsa Lautaro Martinez shënoi golin vendimtar në kohën shtesë, duke i siguruar Argjentinës finalen e madhe kundër Spanjës.

Për Scalonin, kjo do të jetë finalja e dytë radhazi në Kupën e Botës. Ai ishte në stolin e Argjentinës edhe në Katar 2022, ku udhëhoqi “Albicelesten” drejt triumfit ndaj Francës dhe fitimit të titullit të tretë botëror.

Me këtë arritje, tekniku 48-vjeçar bashkohet me një grup trajnerësh legjendarë që kanë prekur të paktën dy finale të Botërorit. Në këtë listë bëjnë pjesë Vittorio Pozzo me Italinë (1934 dhe 1938), Helmut Schön me Gjermaninë (1966 dhe 1974), Mario Zagallo me Brazilin (1970 dhe 1998), Carlos Bilardo me Argjentinën (1986 dhe 1990), Franz Beckenbauer me Gjermaninë (1986 dhe 1990) dhe Didier Deschamps me Francën (2018 dhe 2022).

Tani Scaloni ka mundësinë të hyjë edhe më thellë në histori. Nëse Argjentina mposht Spanjën në finalen e 19 korrikut, ai do të fitojë Kupën e Botës për herë të dytë radhazi si trajner, një arritje që do ta barazonte me italianin Vittorio Pozzo, i vetmi teknik që ka fituar dy Botërorë konsekutivë, në vitet 1934 dhe 1938.