VIDEO/ Futbollistët e Argjentinës tallen me ‘letrën sekrete’ të Pickford-it pas kualifikimit në finale

Festa e Argjentinës pas fitores dramatike 2-1 ndaj Anglisë në gjysmëfinalen e Kupës së Botës 2026 u shoqërua edhe me një moment kurioz. Lojtarët e “Albiceleste”-s u panë duke qeshur, teksa një anëtar i stafit teknik u tregonte shishen e ujit të portierit anglez Jordan Pickford.

Në shishe ishte ngjitur e ashtuquajtura “fletë sekrete”, ku portieri i Anglisë kishte të shënuara udhëzimet për goditjet e mundshme të penalltive, me informacion se në cilën anë zakonisht gjuajnë futbollistët argjentinas.

Argentina’s players found Pickford’s water bottle with penalty shootout instructions on it after the game.
by
u/Doten1 in
soccer

Anglia ishte vetëm pak minuta larg finales ndaj Spanjës, pasi kryesonte deri në minutat e fundit. Megjithatë, Enzo Fernandez barazoi në minutën e 86-të, ndërsa Lautaro Martinez shënoi golin e fitores në kohën shtesë, duke i dhënë fund ëndrrës angleze pa qenë nevoja që ndeshja të shkonte në shtesë apo te penalltitë.

Trajneri Thomas Tuchel kishte bërë disa zëvendësime për të mbrojtur epërsinë, por rikthimi i Argjentinës ndryshoi plotësisht fatin e sfidës.

Për shkak se ndeshja dukej se mund të shkonte te penalltitë, Pickford ishte përgatitur si gjithmonë. Prej vitesh, shumë portierë përdorin shishet e ujit si një “manual” të vogël, ku vendosin shënime për prirjet e kundërshtarëve gjatë goditjeve nga pika e bardhë.

Edhe Pickford kishte përdorur me sukses këtë metodë në Euro 2024, kur një shënim që e udhëzonte të hidhej në të majtë e ndihmoi të priste penalltinë e Manuel Akanji-t.

Por këtë herë “fleta sekrete” nuk pati asnjë vlerë, pasi Argjentina e mbylli ndeshjen brenda 90 minutave. Pas vërshëllimës përfundimtare, shishja e Pickford-it përfundoi në duart e stafit argjentinas dhe u bë objekt batutash mes lojtarëve, përfshirë edhe Lionel Messin, i cili e pa me buzëqeshje listën e përgatitur nga portieri anglez.