Veliaj në Gjykatën e Lartë, ndryshon trupa gjykuese pas dorëheqjes së njërit nga gjyqtarët

Ka ndryshuar trupa gjykuese që do të shqyrtojë rekursin e kryebashkiakut të Tiranës, Erion Veliaj, në Gjykatën e Lartë, pasi anëtari Ilir Panda ka dhënë dorëheqjen nga shqyrtimi i çështjes.

Pas tërheqjes së Pandës, është caktuar një trupë e re gjykuese e përbërë nga Sandër Simoni, në cilësinë e relatorit, si dhe anëtarët Sokol Binaj dhe Albana Boksi.

Dosja e Veliajt u rikthye për rishqyrtim në Gjykatën e Lartë pas vendimit të Gjykatës Kushtetuese të 25 majit, e cila me shumicë votash 5 me 3 vendosi kthimin e çështjes për shqyrtim.

Erion Veliaj ndodhet në paraburgim që prej 10 shkurtit 2025. Ai dhe bashkëshortja e tij, Ajola Xoxa, akuzohen për korrupsion në nëntë raste, ndërsa ndaj Veliajt rëndojnë edhe akuzat për shpërdorim detyre dhe pastrim parash.

Trupa e re e Gjykatës së Lartë pritet të shqyrtojë rekursin dhe të vendosë nëse masa e sigurisë “arrest në burg” ndaj Veliajt është proporcionale, si edhe mbi vijimin e procedurave ligjore.