Barcelona rrit ofertën për Julián Álvarez-in, katalanasit kërkojnë të mbyllin marrëveshjen me Atleticon

Barcelona është gati të përmirësojë ofertën për Julián Álvarez-in, i cili mbetet objektivi kryesor i klubit katalanas për të përforcuar sulmin pas largimit të Robert Lewandowski-t. Në “Camp Nou” pranojnë se propozimi i parë nuk ishte i mjaftueshëm dhe tashmë po përgatitet një ofertë e re për Atletico Madridin.

Drejtuesit e Barcelonës vazhdojnë të jenë optimistë për mundësinë e arritjes së një marrëveshjeje, por e dinë se për të bindur klubin madrilen duhet të rrisin ndjeshëm shumën e ofruar për sulmuesin argjentinas.

Presidenti i Barcelonës, Joan Laporta, gjatë qëndrimit në Dallas për të ndjekur gjysmëfinalen e Botërorit mes Spanjës dhe Francës, deklaroi se oferta e klubit ishte “e një vlere shumë të rëndësishme”, por shtoi se ajo nuk do të jetë pa kufij.

“Herën e fundit që folëm me Miguel Ángel Gil Marín isha shumë i qartë. Kishte një keqkuptim rreth ofertës sonë, të cilin e sqarova, dhe që atëherë nuk kemi avancuar më”, u shpreh Laporta.

Megjithatë, sipas mediave spanjolle, Barcelona po përgatit një ofertë më të lartë dhe pritet t’i drejtohet sërish Atletico Madridit pas përfundimit të Kupës së Botës. Oferta e parë katalanase mendohet se ishte nën 100 milionë euro, ndërsa klauzola e largimit të Julián Álvarez në kontratën e tij arrin në 500 milionë euro.

Situata ndryshoi pas deklaratave të vetë lojtarit gjatë Botërorit, ku ai shprehu dëshirën për t’u larguar dhe për të realizuar një ëndërr të re. Më herët, Atletico kishte reaguar me ironi ndaj interesimit të Barcelonës, por qëndrimi i klubit ndryshoi pas kërkesës publike të sulmuesit argjentinas për një transferim.

Megjithatë, Barcelona duhet të bëjë një përpjekje të madhe financiare për të finalizuar marrëveshjen. Trajneri Hansi Flick nuk dëshiron të presë deri në fund të merkatos për të mësuar përfundimisht përbërjen e skuadrës, pasi në sezonet e mëparshme ka pasur probleme me regjistrimet e lojtarëve dhe largime të papritura.

Laporta ka bërë të qartë se Barcelona nuk do të hyjë në një negociatë pa afat. “Ne do të vendosim ritmin tonë. Kjo ofertë nuk do të jetë e vlefshme përgjithmonë. E kemi bërë me dëshirën për të marrë një lojtar që pëlqehet nga trajneri dhe drejtoria sportive”, tha presidenti katalanas.

Tashmë pritet që ditët e ardhshme të jenë vendimtare për të ardhmen e Julián Álvarez, me Barcelonën që kërkon ta bëjë argjentinasin liderin e ri të sulmit.