Argjentina u beson edhe bestytnive para sfidës me Zvicrën, astrologu paralajmëron rolin kyç të Dibu Martínez

Pak ditë para ndeshjes vendimtare ndaj Zvicrës në Kupën e Botës, në Argjentinë vëmendjen nuk e kanë marrë vetëm analizat sportive, por edhe parashikimet astrologjike. Guido Tejat, një astrolog i vetëshpallur, ka bërë një parashikim që ka ngjallur debat dhe është pasqyruar gjerësisht në mediat argjentinase.

Sipas Tejat, kombëtarja argjentinase do të ketë nevojë për diçka më shumë se futbolli për të siguruar kualifikimin. Duke cituar filozofin Seneka, ai u shpreh: "Zjarri e provon arin, ndërsa vështirësitë forcojnë njerëzit e fortë." Sipas tij, portieri Emiliano "Dibu" Martínez do të jetë figura vendimtare në përballjen me Zvicrën, ashtu siç ishte në çerekfinalen epike ndaj Holandës në Botërorin e vitit 2022.

Parashikimi i astrologut ka gjetur jehonë të madhe në Argjentinë, ku besimi te bestytnitë dhe ndërthurja e elementëve mistikë me futbollin janë pjesë e kulturës sportive. Edhe temperaturat e larta të javëve të fundit duket se kanë shtuar atmosferën e veçantë rreth kësaj sfide.

Në mesazhin e tij, Tejat imagjinon një Martínez të buzëqeshur dhe të gatshëm për të mbajtur mbi supe shpresat e një kombi të tërë. "E imagjinoj Dibu-në të lumtur, duke festuar dhe duke mbështetur një vend të tërë. Të shtunën duhet të luajë një ndeshje të madhe", përfundoi ai.

Tashmë mbetet për t'u parë nëse parashikimi do të realizohet, ndërsa Argjentina synon një tjetër hap drejt ëndrrës për të mbrojtur titullin botëror.