VIDEO/ Ronaldo ndahet nga Portugalia pas eliminimit, largohet me avion privat dhe jo me kombëtaren
Cristiano Ronaldo nuk u kthye në Portugali së bashku me pjesën tjetër të kombëtares pas eliminimit nga Kupa e Botës 2026. Kapiteni portugez zgjodhi të udhëtonte me avionin e tij privat, ndërsa shokët e skuadrës u rikthyen në Lisbonë me fluturimin e organizuar nga federata.
Sipas raportimeve të Marca, 41-vjeçari u shfaq i qetë në aeroport dhe përshëndeti me mirësjellje stafin përpara nisjes.
🚨 Cristiano Ronaldo was seen arriving in Lisbon this morning on his private jet after Portugal’s elimination against Spain.
— MARCA in English 🇺🇸 (@MARCAinENGLISH) July 8, 2026
He did not return with his teammates, marking a quiet end to what appears to be his final World Cup 💔#ronaldo #cristianoronaldo #cr7 #cristiano pic.twitter.com/to3YoU9y9a
Largimi i tij ka tërhequr vëmendjen, pasi vjen pas një Botërori ku ai ishte në qendër të kritikave.
Portugalia u eliminua nga Spanja në fazën e 1/8-ave, ndërsa shumë analistë kanë vënë në dyshim ndikimin e Ronaldos në lojën e skuadrës, duke argumentuar se kapiteni nuk arriti të përshtatej me ritmin dhe stilin e ekipit.
Pavarësisht kritikave, sulmuesi portugez shkroi një tjetër faqe historie.
Në Botërorin 2026 ai u bë futbollisti i parë që shënon në gjashtë edicione të ndryshme të Kupës së Botës, pasi realizoi ndaj Uzbekistanit në fazën e grupeve.
Ronaldo e mbylli turneun me tre gola, përfshirë një penallti ndaj Kroacisë në fazën e 1/16-ave, që ishte edhe goli i tij i parë në fazat me eliminim direkt të një Botërori.
Në total, legjenda portugeze ka zhvilluar 27 ndeshje në Kupat e Botës, duke realizuar 11 gola dhe dhënë dy asistime.
Me fanellën e Portugalisë ai numëron 233 paraqitje, 146 gola dhe 46 asistime, ndërsa në karrierën e tij me kombëtaren ka fituar Euro 2016 dhe dy trofe të Ligës së Kombeve.