‘Kemi Salah-un dhe 26 ‘Messi’ në skuadër’, Egjipti sfidon Argjentinën jashtë fushe

Atmosfera para përballjes mes Argjentinës dhe Egjiptit në 1/8-at e finales së Botërorit 2026 po nxehet edhe jashtë fushës. Ibrahim Hassan, ndihmëstrajner i Egjiptit dhe vëllai binjak i përzgjedhësit Hossam Hassan, ka bërë deklarata sfiduese përpara duelit me kampionët në fuqi të botës.

Ai theksoi se skuadra egjiptiane nuk është e shqetësuar nga prania e Lionel Messit dhe se beson plotësisht te forca e grupit të saj.

“Të luajmë kundër Messit? As që mendojmë për këtë. Ne jemi të përqendruar vetëm te kombëtarja e Egjiptit. Hyjmë në fushë për të luftuar në çdo ndeshje, qoftë kundër Messit apo kujtdo tjetër. Ne kemi Mohamed Salah-un dhe 26 ‘Messi’, si edhe futbollistë të nivelit të lartë”, deklaroi Ibrahim Hassan.

Egjipti po zhvillon Botërorin më të mirë në historinë e tij. Pas kalimit për herë të parë të fazës së grupeve, “Faraonët” eliminuan Australinë dhe siguruan një vend në mesin e 16 skuadrave më të mira të turneut.

Ibrahim Hassan foli edhe për gjendjen e Mohamed Salah-ut, i cili mbërriti në Botëror me dyshime për formën e tij fizike.

“Mohamed Salah po rikthen formën e tij më të mirë me Hossam Hassan dhe me kombëtaren e Egjiptit. Ai është një shembull i madh për të gjithë skuadrën”, u shpreh ai.

Ndihmëstrajneri vlerësoi gjithashtu punën e vëllait të tij në drejtimin e ekipit.

“Hossam e përgatit çdo ndeshje sikur të ishte një provim. Ai studion kundërshtarin në detaje dhe u transmeton lojtarëve gjithçka që duhet të dinë. Kjo u jep atyre shumë besim”, shtoi Hassan.

Në fund, ai zbuloi edhe mesazhin që stafi teknik ua ka përcjellë futbollistëve që nga fillimi i Botërorit.

“U themi gjithmonë të japin maksimumin. Nuk e dimë nëse do të kemi sërish mundësinë të luajmë në një Kupë Bote. Synimi ynë është të shkojmë sa më larg në këtë turne”, përfundoi ai.