Shpërthen norovirusi në Alaskë, mbi 100 pasagjerë të infektuar në një anije turistike

Një anije luksoze turistike në një udhëtim 20-ditor në Alaskë është vënë në gatishmëri pasi më shumë se 100 pasagjerë u sëmurën me simptoma të të vjellave dhe diarresë pas një shpërthimi të norovirusit në bord. Norovirusi, i quajtur shpesh gripi i stomakut, shkakton sëmundje gastrointestinale dhe përhapet lehtësisht përmes kontaktit të drejtpërdrejtë, sipërfaqeve të kontaminuara dhe ushqimit ose pijeve që kanë rënë në kontakt me virusin.

Ekspertët paralajmërojnë se pacientët mund ta përhapin norovirusin për dy javë ose më shumë pasi simptomat të zhduken.
Shpërthimi në Ruby Princess u raportua për herë të parë më 28 qershor. Sipas të dhënave, ai ka sëmurë pak më shumë se 3% të pasagjerëve dhe rreth 2% të ekuipazhit. Anija turistike ishte nisur nga San Francisco më 12 qershor, duke ndaluar në destinacione në Kanada dhe Alaska përpara se anija të kthehej në Kaliforni këtë javë.

Princess Cruises tha se ekuipazhi menjëherë rriti masat e pastrimit dhe dezinfektimit, dhe mostrat e jashtëqitjes u mblodhën nga pacientët për testime laboratorike. Pasagjerët dhe anëtarët e ekuipazhit që shfaqën simptoma u izoluan, dhe kompania ishte në kontakt me programin shëndetësor të anijeve të CDC-së për të kufizuar përhapjen.

“Ekuipazhi ynë reagoi menjëherë, duke zbatuar protokolle të përmirësuara higjienike në të gjithë anijen, dhe incidentet që atëherë kanë rënë dhe mbeten të ulëta”, tha kompania në një deklaratë.

Sipas mediave, që nga fillimi i vitit, CDC ka regjistruar shtatë shpërthime sëmundjesh në anijet turistike. Tre prej tyre përfshijnë anijet Princess Cruises dhe janë të lidhura me norovirusin. Shpërthime të mëparshme ndodhën në Star Princess dhe Caribbean Princess, në udhëtime që u zhvilluan në mars dhe nga fundi i prillit deri më 11 maj.

Dy shpërthime të tjera të norovirusit janë raportuar këtë vit nga Lindblad Expeditions në National Geographic Sea Bird, dhe dy shpërthime të cilat janë regjistruar gjithashtu në anije të tjera turistike.

Si transmetohet norovirusi dhe si mbahet nën kontroll?

CDC rekomandon larjen e shpeshtë të duarve, gatimin e plotë të butakëve, larjen e frutave dhe perimeve, pastrimin dhe dezinfektimin e sipërfaqeve, larjen e rrobave me ujë të nxehtë dhe izolimin për dy ditë pasi simptomat të zhduken.