Do përplaset me shpejtësi në Tokë, NASA nis misionin e shpëtimit

Një anije kozmike me 3 krahë është lëshuar në orbitë në një mision të jashtëzakonshëm për të shpëtuar një nga teleskopët e NASA-s, i cili rrezikon të humbasë kontrollin dhe të bjerë drejt Tokës.

Misioni po realizohet nga kompania Northrop Grumman, e cila nisi në hapësirë anijen ‘Link’, të zhvilluar nga Katalyst Space Technologies. Lëshimi u krye nga Ishujt Marshall në Oqeanin Paqësor, duke përdorur një raketë Pegasus që u ngrit nga barku i një avioni të modifikuar posaçërisht për këtë lloj nisjeje.

Objektivi i misionit është teleskopi ‘Swift’, i NASA-s, i cili është në orbitë që prej vitit 2004. Për shkak të rritjes së aktivitetit diellor dhe forcës së shtuar të atmosferës së Tokës, teleskopi ka humbur gradualisht lartësi dhe rrezikon të hyjë në një trajektore të pakthyeshme drejt shkatërrimit.

NASA ka investuar rreth 30 milionë dollarë në këtë operacion shpëtimi, duke i dhënë Katalyst detyrën për të kapur teleskopin dhe për ta ngritur atë rreth 150 milje më lart në orbitë, në mënyrë që të zgjasë jetën e tij shkencore.

Nëse misioni përfundon me sukses, teleskopi ‘Swift’ pritet të rikthehet në funksion dhe të vazhdojë të vëzhgojë disa nga fenomenet më të fuqishme të universit, përfshirë shpërthimet e rrezeve gama dhe yjet që shpërthejnë në supernova.

Sipas planit, anija ‘Link’ do të arrijë teleskopin brenda rreth një muaji dhe do të kryejë një manovër delikate për ta ngritur gradualisht në orbitë, pa e dëmtuar strukturën e tij.

Ky operacion konsiderohet një nga misionet më të guximshme dhe inovative të viteve të fundit në eksplorimin hapësinor, duke hapur rrugën për shpëtimin e teleskopëve të tjerë në të ardhmen, përfshirë edhe ‘Hubble’, i cili gjithashtu po humbet gradualisht lartësi.

Nëse gjithçka shkon sipas planit, teleskopi ‘Swift’ mund të rikthehet në vëzhgim të universit që në muajin shtator, duke vazhduar të zbulojë misteret e kozmosit nga orbita e Tokës.