Belgjikë/ Zjarri përfshin pallatin 10 katësh, momenti kur burri i shpëton flakëve duke kaluar tek dritarja e fqinjit
Të paktën gjashtë persona kanë humbur jetën dhe disa të tjerë janë plagosur nga një zjarr që shpërtheu në një pallat 10-katësh në Antwerp të Belgjikës, njoftoi policia belge.
Re të dendura tymi u panë duke dalë nga kati i tetë i godinës në lagjen Linkeroever, pasi zjarri shpërtheu pak para orës 10:00 të së mërkurës.
Pamjet dramatike treguan një burrë që, për t’i shpëtuar tymit të zi, kaloi nga ballkoni i apartamentit të tij drejt dritares së një fqinji.
Policia tha se në këtë pallat jetojnë më shumë se 200 persona dhe se shërbimet zjarrfikëse evakuuan 80 apartamente në ndërtesë.
Sipas autoriteteve, zjarri u shkaktua nga një problem teknik në katin përdhes.
'Ky zjarr ka shkaktuar pasoja të rënda këtu në Linkeroever', tha zëdhënësja e policisë, Kim Bastiaens, për televizionin publik belg, duke shtuar se një numër personash kanë pësuar lëndime të rënda dhe të lehta.
Banori Geert Dewulf tregoi për VRT se tymi i dendur e kishte penguar të dilte nga apartamenti i tij.
'U izoluam brenda apartamentit dhe pritëm në ballkon. Rreth 10 minuta më vonë, zjarrfikësit erdhën dhe na shpëtuan nga ballkoni me shkallën e tyre', tha ai.
Zjarrfikësit deklaruan se po kontrollonin apartament pas apartamenti për të gjetur viktima të mundshme, duke shpjeguar se tymi ishte përhapur me shpejtësi në të gjithë ndërtesën, duke e bërë më të vështirë evakuimin e banorëve.
Një tjetër banor tha se vjehrri dhe vjehrra e tij, mes tyre edhe ish-kryetari i Bashkisë së Antwerpit, Bob Cools, u evakuuan me sukses dhe u dërguan në spital.
'Bëmë gjithçka që mundëm për të shpëtuar macen, por fatkeqësisht në fund nuk ia dolëm', tha ai.
Policia bëri të ditur se deri në mesditë zjarri ishte pothuajse nën kontroll.
Zëdhënësja e brigadës së zjarrfikësve të Antwerpit, Marie de Clercq, tha se bëhej fjalë për një zjarr kompleks dhe se dukshmëria e dobët, si dhe tymi i dendur, e kishin vështirësuar shuarjen e flakëve.
Kryeministri belg, Bart De Wever, deklaroi se mendimet e tij ishin me viktimat dhe banorët e evakuuar nga 'zjarri i tmerrshëm' në Linkeroever.
Parlamenti flamand e nisi seancën e së mërkurës pasdite me një minutë heshtje në nderim të viktimave të kësaj tragjedie, shkruan BBC.