E rëndë për Bastonin, nën hetim për prostitucion me të mitur, avokati: Nuk dimë asgjë

Mbrojtësi i Interit dhe i kombëtares italiane, Alessandro Bastoni, është vënë nën hetim nga Prokuroria e Milanos për dyshimin e veprës penale të prostitucionit me të mitur. Futbollisti ka marrë gjatë ditës njoftimin zyrtar për hetimin dhe pritet të merret në pyetje në ditët në vijim.

Sipas hetuesve, Bastoni dyshohet se ka pasur një marrëdhënie seksuale me pagesë me një vajzë, e cila në kohën e ngjarjes ishte 17 vjeçe. Emri i tij është përfshirë në një hetim të gjerë, të koordinuar nga prokurorja Rosaria Stagnaro dhe zëvendësprokurorja Bruna Albertini, ndërsa hetimet po zhvillohen nga Njësia e Policisë Ekonomike dhe Financiare e Gardës së Financës.

Çështja lidhet me një agjenci eskortash me seli në Cinisello Balsamo, e cila dyshohet se organizonte mbrëmje luksoze “all inclusive” për klientë VIP në lokale të njohura të Milanos dhe hotele luksoze. Sipas hetimeve, në disa raste gjatë këtyre aktiviteteve përdorej edhe e ashtuquajtura “droga e të qeshurit”.

Prokuroria dyshon për ekzistencën e një rrjeti të shfrytëzimit dhe favorizimit të prostitucionit, ku eskortat nxiteshin të afroheshin me futbollistë të Serisë A, sportistë të tjerë dhe persona të njohur.

Bastoni rezulton futbollisti i parë që është vënë zyrtarisht nën hetim në këtë çështje. Megjithatë, rrethanat mbeten ende për t'u sqaruar. Vajza 17-vjeçare, e pyetur si dëshmitare, ka deklaruar se mes saj dhe futbollistit nuk ka pasur asnjë marrëdhënie. Sipas dosjes hetimore, megjithatë, ekziston një mesazh në një bisedë elektronike të qershorit 2020, i cili sipas prokurorëve do të provonte organizimin e takimit nga një person i lidhur me grupin.

Bastoni është thirrur të paraqitet për t'u marrë në pyetje të premten, më 3 korrik, ku do të ketë mundësinë të japë shpjegimet e tij.

Hetimi doli në dritë më 21 prill, kur katër persona u vendosën në arrest shtëpiak, mes tyre Emanuele Buttini dhe Deborah Ronchi. Sipas prokurorisë, ata konsiderohen organizatorët kryesorë të grupit të dyshuar kriminal, megjithëse i kanë mohuar të gjitha akuzat.

Përveç Bastonit, janë thirrur edhe tre futbollistë të tjerë, Daniel Maldini, Riccardo Calafiori dhe Kevin Bonifazi, por vetëm në cilësinë e dëshmitarëve dhe jo si persona nën hetim.

Ndërkohë, avokati i Bastonit, Salvatore Scuto, ka mohuar kategorikisht akuzat.

“Klienti im mohon se ka pasur një marrëdhënie me një vajzë për të cilën e dinte se ishte e mitur. Ftesa për t'u paraqitur më 3 korrik është bërë pa na dhënë informacion mbi përmbajtjen e hetimeve. Nuk dimë asgjë për dosjen dhe do të vlerësojmë nëse do t'u përgjigjemi apo jo pyetjeve të prokurorëve”, deklaroi ai.