Të paktën 13 persona humbën jetën në përmbytjet në Ganë

Të paktën 13 persona kanë vdekur në kryeqytetin e Ganës, Accra, në përmbytjet e shkaktuara nga shirat e rrëmbyeshëm, thanë zjarrfikësit.

Qeveria u bëri thirrje qytetarëve të qëndrojnë në shtëpi ose të zhvendosen në vende më të larta, pasi agjencia meteorologjike paralajmëroi se priten më shumë reshje për shkak të një stuhie të madhe që po afrohet nga lindja e vendit, raporton BBC.

Të dielën u raportuan reshje të dendura shiu të cilat janë zbutur gradualisht që atëherë, por zjarrfikësit thanë se numri i të vdekurve mund të vazhdojë të rritet.

Zjarrfikësit njoftuan se deri më tani janë shpëtuar më shumë se 470 persona.

Ekipet e policisë, zjarrfikësve dhe ushtrisë janë vendosur në të gjithë rajonin e prekur nga përmbytjet.

Disa qytetarë mbetën të bllokuar në shtëpitë e tyre dhe kompanitë e furnizimit me energji elektrike pezulluan furnizimin me energji elektrike në disa pjesë të Akrës.

Përmbytjet përkeqësohen nga sistemet e dobëta të kullimit, ullukët e bllokuar dhe ndërtimi i strukturave të paligjshme në rrugët ujore.

Presidenti i Ganës, John Dramani Mahama, tha se "veprimet e papërgjegjshme të disa individëve përfundojnë duke rrezikuar komunitete të tëra" dhe urdhëroi prishjen e tyre.