George Soros dhe djali i tij Alex derdhin shumën rekord prej 103 milionë dollarësh në zgjedhjet e mesmandatit

Manjati miliarder dhe financuesi i njohur i demokratëve, George Soros, së bashku me djalin e tij Alex, kanë shpenzuar plot 102.8 milionë dollarë në ciklin zgjedhor të zgjedhjeve të mesmandatit, duke u bërë arkitektët kryesorë të zhvendosjes së Partisë Demokratike drejt së majtës radikale.

Me zgjedhjet e nëntorit ende më shumë se katër muaj larg, George Soros mund të thyejë rekordin e tij prej 128 milionë dollarësh, të vendosur në zgjedhjet e mesmandatit katër vjet më parë, kur ishte donatori më i madh individual.

"Paratë flasin dhe paratë e Sorosit thonë se rritjet më tinëzare, antikushtetuese dhe më të kushtueshme të taksave në historinë amerikane janë në tryezë", tha Douglas Kellogg, drejtor i projekteve shtetërore në organizatën Americans for Tax Reform.

Ai shtoi se Sorosi është një "keqbërës që do të ishte perfekt në filmat e James Bondit", përgjegjës për marrjen nën kontroll të Partisë Demokratike nga e majta radikale.

Vetëm një pjesë e vogël e kontributeve të këtij cikli, 793,800 dollarë, janë bërë në emrin e donatorit 95-vjeçar, sipas një shqyrtimi të të dhënave publike të Komisionit Federal të Zgjedhjeve (FEC).

Pothuajse e gjithë shuma, 102 milionë dollarë, është kanalizuar përmes Democracy Political Action Committee (Democracy PAC), super PAC-ut që Sorosi krijoi në vitin 2020 dhe që shërben si krahu kryesor politik i familjes, duke e bërë më të vështirë identifikimin e kandidatëve radikalë që mbështeten prej tyre.

Nga kjo shumë, pak më shumë se gjysma, 52 milionë dollarë, erdhi nga George Soros përmes kompanisë private Geosor në emrin e tij, ndërsa 50 milionë dollarët e tjerë nga organizata jofitimprurëse Fund forPolicy Reform, ku Alex Soros figuron si drejtor në dokumentet tatimore.

Kjo pa llogaritur organizatën kryesore të familjes, Open Society Foundation, e cila financon përpjekje për dekriminalizimin e drogës, hapjen e kufijve dhe shfuqizimin e policisë, si edhe degën e saj lobuese, Open Society Action Fund, e cila është edhe më pak transparente pasi, si organizatë jofitimprurëse, nuk është e detyruar të publikojë shpenzimet politike.

Në ciklet e mëparshme zgjedhore, fondet e Open Society Action Fund kanë shkuar për grupe që mbështesin figura të së majtës si Alexandria Ocasio - Cortez dhe Ilhan Omar, por deklarimet tatimore për vitin 2025 ende nuk janë publikuar.

Kontrolli i Democracy PAC, ku përfundoi pjesa më e madhe e parave të familjes, ndryshoi përpara zgjedhjeve presidenciale të vitit 2024, kur George Soros ia dorëzoi drejtimin e perandorisë së tij djalit Alex, të cilin e ka cilësuar si "më politik" se ai vetë. Alex është i katërti nga pesë fëmijët e tij.

"Ai dëshiron të jetë më politik se babai. Ky është cikli i parë i zgjedhjeve të mesmandatit ku ai ka kontrollin", tha ParkerThayer, studiues në Capital Research Center, për New York Post.

"George nuk është më në kontroll dhe nuk ka qenë prej disa kohësh."

Kontributet e bëra në emër të George dhe Alex Sorosit kanë ndjekur pothuajse të njëjtën linjë këtë cikël, duke mbështetur shumë nga kandidatët e së majtës. Alex Soros shtoi personalisht edhe 140,525 dollarë në përpjekjet elektorale të familjes.

Alex Soros, 40 vjeç, dhe babai i tij George dhuruan secili shumën maksimale prej 7000 dollarësh (14,000 dollarë gjithsej) për kandidatin për Senatin në Maine, Graham Platner, i cili është akuzuar për sjellje të papërshtatshme ndaj grave dhe shpesh sulmon të pasurit, pavarësisht se është rritur në një familje të pasur dhe financohet nga miliarderë.

Alex Soros dhuroi gjithashtu shumën maksimale prej 7000 dollarësh për Ilhan Omarin, e cila është kritikuar për pretendimet se kishte dijeni për mashtrime të përhapura në komunitetin somalez në distriktin e saj në Minneapolis. Omar i ka mohuar këto akuza.

Ai po ashtu dhuroi 7000 dollarë për kongresistin Ro Khanna nga Kalifornia, një figurë e së majtës në Silicon Valley, i cili thuhet se po shqyrton mundësinë e kandidimit për president në vitin 2028.

Alex dhe George Soros dhanë gjithashtu kontributet maksimale për dy kandidatë të tjerë të mundshëm demokratë për zgjedhjet presidenciale të vitit 2028. Senatori Raphael Warnock dhe senatori Jon Ossoff, të dy nga Georgia, morën nga 14,000 dollarë secili.

Në total, familja Soros ka derdhur tashmë 52% më shumë para në fondin e saj politik sesa në vitin 2024, kur kanalizoi 67 milionë dollarë në Democracy PAC, sipas dokumenteve të fushatës.

George Soros, të cilin presidenti Donald Trump e përmendi në shtator kur urdhëroi FBI-në të godiste atë që e quajti "terrorizëm i së majtës", është cilësuar si një nga financuesit kryesorë të fushatave ekstremiste në SHBA dhe jashtë saj.

Sipas artikullit, ai ka dhënë mbi 15 milionë dollarë për organizata pro-Hamasit që qëndronin pas protestave në universitete, ka financuar grupe që furnizuan protestuesit kundër ICE-s në Delaney Hall me pajisje ushtarake dhe ka shpenzuar mbi 7 milionë dollarë për nisma ligjore që lehtësojnë dënimet penale.

"Familja Soros është më e zemëruar se kurrë me politikën amerikane", tha Thayer. "Ata do të donin ta transformonin Amerikën në diçka krejtësisht tjetër."

Rrjeti i fondacioneve të familjes ka mohuar pretendimet se është një organizatë terroriste, duke këmbëngulur se misioni i tij është forcimi i demokracisë.

Ashtu si djali i tij, edhe George Sorosi dha kontributin maksimal për Graham Platnerin. Babë e bir dhuruan gjithashtu nga 7000 dollarë secili për kongresisten Pramila Jayapal, e cila muajin e kaluar pranoi se kishte futur fshehurazi naftë në Kubë, pavarësisht embargos amerikane.

"Në jetë ka dy gjëra të sigurta: vdekja dhe George Sorosi që firmos një çek të bardhë për demokratët", deklaroi zëdhënësja e Komitetit Kombëtar Republikan, Delanie Bomar.

"Ata nuk kanë para dhe burime sa republikanët, prandaj po mbështeten te paratë e errëta të një miliarderi."

Sipas një analize të Washington Post që shqyrtoi edhe 49 donatorë të tjerë, George Sorosi është donatori më i madh individual në zgjedhjet e mesmandatit të vitit 2026.

Sorosi, i lindur në Budapest në një familje hebraike, u zhvendos në Mbretërinë e Bashkuar pasi i mbijetoi pushtimit nazist të Hungarisë. Më pas themeloi fondin e tij të parë spekulativ dhe u bë i njohur si "njeriu që theu Bankën e Anglisë", pasi fitoi rreth 1 miliard dollarë duke spekuluar kundër paundit britanik gjatë "Të Mërkurës së Zezë" në vitin 1992.

Hungaria miratoi në vitin 2018 ligjet "Stop Soros", duke e detyruar Open Society Foundation të zhvendoste aktivitetin e saj europian në vende të tjera.

Djali i tij Alex, i diplomuar në Universitetin e Nju Jorkut, ishte beqar për shumë vite përpara se të martohej verën e kaluar me Huma Abedinin, ish-këshilltare e HillaryClinton, në një ceremoni luksoze në Hamptons, ku të ftuar ishin Anna Wintour, Barack dhe Michelle Obama, si edhe Bill dhe Hillary Clinton.

Një zëdhënës i familjes Soros nuk pranoi të komentonte. / New York Post – Syri.net