Koreja e Jugut në krizë: kërcënime me vdekje ndaj trajnerit Hong pas eliminimit

Situatë alarmante në Korenë e Jugut pas eliminimit të kombëtares nga Kampionati Botëror 2026. Ish-trajneri i përfaqësueses, Hong Myung-bo, është vënë në qendër të një vale kërcënimesh të rënda me vdekje në rrjet, pas dështimit të skuadrës për të kaluar në fazën me eliminim direkt.

Policia koreano-jugore ka nisur një hetim zyrtar pas një postimi online ku një përdorues, që pretendonte të ishte një shtetas amerikan 41-vjeçar, deklaronte se do të vriste trajnerin në aeroportin ndërkombëtar Incheon në momentin e kthimit të tij në vend. Autoritetet kanë hapur procedurat për identifikimin e autorit dhe po e trajtojnë rastin si kërcënim serioz.

Sipas raportimeve të medieve lokale, përfshirë Radio Seoul, situata ka kaluar përtej hapësirës virtuale, duke u shoqëruar edhe me reagime në jetën reale. Në rrjet kanë qarkulluar imazhe të manipuluara që sugjerojnë urdhra të rremë të Hong ndaj lojtarëve, si dhe postera në disa zona të provincës Gyeonggi me mbishkrimin “Hong Myung-bo i ndaluar”.

Kjo valë armiqësie pasqyron zhgënjimin e madh të tifozëve pas humbjes 0-1 ndaj Afrikës së Jugut në ndeshjen vendimtare të Grupit A, rezultat që i dha fund shpresave të Koresë së Jugut për kualifikim në fazën tjetër të Botërorit.

Autoritetet po bëjnë thirrje për qetësi dhe theksojnë se çdo formë dhune apo kërcënimi nuk do të tolerohet, ndërsa hetimet për rastin vijojnë në bashkëpunim me strukturat ndërkombëtare.