'Nuk ishte nën ndikimin e drogës', familja e Whitney Houston përplaset me Oprah Winfrey

Familja e së këngëtares legjendare Whitney Houston ka hedhur poshtë kategorikisht pretendimet e moderatores Oprah Winfrey se këngëtarja ishte nën ndikimin e drogës gjatë një paraqitjeje në emisionin e saj.

Winfrey, gjatë një fjalimi në Cannes Lions, foli për ndikimin që kishte emisioni i saj “The Oprah Winfrey Show”, duke pretenduar se kishte shmangur një poshtërim publik për Houston pasi kishte bindur publikun të mos publikonte pamje nga një incident, ku artistja kishte rënë nga skena.

Megjithatë, fondacioni që administron trashëgiminë e Whitney Houston reagoi ashpër ndaj këtyre deklaratave, duke theksuar se këngëtarja nuk ishte nën ndikimin e substancave në momentin e incidentit.

Pat Houston, kunata e artistes dhe drejtuesja e fondacionit, iu përgjigj deklaratave të Winfrey përmes një postimi në Instagram. Sipas saj, Houston kishte rënë nga skena gjatë një prove teknike, për shkak të errësirës në ambient dhe mungesës së familjaritetit me skenën.

“Whitney vërtet ra nga skena, por kjo ndodhi gjatë provave dhe jo gjatë performancës. Ajo nuk ishte në asnjë mënyrë nën ndikimin e drogës”, theksoi Pat Houston.

Ajo pranoi se këngëtarja kishte pasur një betejë të gjatë me varësinë dhe abuzimin me substancat, por shtoi se është e padrejtë që çdo moment i jetës së saj të lidhet automatikisht me këtë problem.

“Si shumë njerëz, Whitney u përball me sfida personale. Por është e pasaktë dhe e padrejtë që kjo betejë të lidhet me çdo paraqitje apo çdo kapitull të jetës së saj”, deklaroi ajo.

Në fund të reagimit të saj, Pat Houston nënvizoi se publiku pa në skenë një artiste të talentuar, të disiplinuar dhe të përkushtuar, duke shtuar se trashëgimia e Whitney Houston meriton të mbështetet në fakte dhe jo në mite.

Debati u ndez pas deklaratave të Oprah Winfrey në Cannes Lions, ku ajo tha se rënia e Houston nga skena mund t’i kishte kushtuar karrierën. Sipas Winfrey, gjatë një prej paraqitjeve të artistes në emisionin e saj, publiku kishte kamera dhe ajo i kishte lutur të mos publikonin fotografitë e incidentit, pasi kjo mund të kishte shkatërruar jetën e këngëtares.

Whitney Houston, e cila ndërroi jetë në vitin 2012, kishte pranuar publikisht betejën e saj me varësinë. Ajo kishte hyrë të paktën tri herë në qendra rehabilitimi, në vitet 2004, 2005 dhe 2011. Në një intervistë me Oprah Winfrey në vitin 2009, Houston rrëfeu se përdorimi i drogës ishte bërë pjesë e përditshmërisë së saj që nga mesi i viteve ’90, duke e përshkruar varësinë si një përvojë të dhimbshme dhe shkatërruese.

Whitney Houston ishte një nga artistet më të suksesshme dhe më me ndikim në historinë e muzikës, me mbi 200 milionë disqe të shitura në mbarë botën. Ajo u bë e njohur falë zërit të saj të jashtëzakonshëm dhe hiteve si “I Will Always Love You”, “I Wanna Dance with Somebody” dhe “Greatest Love of All”, duke lënë pas kështu një trashëgimi të jashtëzakonshme në muzikën botërore. Përveç muzikës, ajo shënoi sukses edhe në kinematografi me rolin kryesor në filmin “The Bodyguard”.